Gipareglaha’g dunggab kilid tuhab

CEBU, Philippines - Natuhab ang  kilid sa usa ka tawo kinsa gipareglahan  og  dunggab sa   wala hiilhing kriminal  didto sa sitio Soong sa barangay Mactan, dakbayan sa Lapulapu sa miaging gabii.

Ang biktima mao si Noel Destora, 42, minyo nga nagpuyo sa sitio Bagongbayan sa barangay Maribago sa maong dakbayan

Si PO1 Jomar Florentino sa homicide section sa kapolisan sa maong dakbayan nga nahinabi sa Banat News miingon nga nagbarogbarog lang ang biktima sa  daplin sa karsada   samtang nagpaabot  sa  iyang higala nga adunay gipalit sa tindahan.

Matud pa sa biktima nga nakita pa niya  ang wala hiilhing lalaki nga kusog kaayong nagdagan paingon   kaniya   ug sa pagsaylo   kalit  lang giduslak  ang  iyang  kilid  sa kutsilyo  sa kriminal  hinungdan  nga mibuhagay  ang  daghang  dugo.

Pagsil-ing  niya nga  natuhab  sa samad  ang  iyang  kilid misinggit  siya  sa  pagpangayo  og panabang sa iyang higala  kinsa  maoy  misakwat  kaniya   sa paghatud  ngadto sa Mactan Doctors Hospital.

Si PO1 Florentino nagkanayon  nga mitug-an kaniya  ang  biktima  nga wala kini kontra sa maong dapit   busa  nagtuo  sila  nga   ang  nahitabo  usa  ka  paregla.

Apan  ang  kapolisan  sa maong  dakbayan  padayon  pa sa pagpaniid  aron  pag-ila  sa kriminal. (/WC)  (BANAT NEWS)