Mga PWD nakadawat og tag P500

CEBU, Philippines - Mokabat sa 2,000 ka membro sa Persons with Disabilities (PWD) sa dakbayan sa Mandaue ang nakadawat og tag P500 nga pinansiyal nga hinabang gikan sa kagamhanan sa maong dakbayan.

Sa mubo nga pagbukas sa maong kalihokan nga gipahigayon sa sulod sa Mandaue City Sports and Cultural Complex sa sitio Tribunal sa barangay Centro  gipahibalo ni Mayor Jonas Cortes nga ang  talagsaong pag-usbaw  sa tax collection sa dakbayan   sa tuig  2012 nakaaghat  kaniya sa  pagpasalig  sa  mga  PWD  nga  karong  tuig 2013 himoon  na  niya  kining  tag P1,000, gikan  sa P500.

Sa nasayran  atol  sa  State of the City Address (SOCA) sa  mayor niadtong Disyembre 19 niining tuiga  iyang gipadayag ang epektibo nilang pamaagi sa pagkolekta og buhis.

Matud pa niya nga sa bulan sa Nobiyembre  misaka  ang  ilang  koleksyon og   13 porsiyento  sa business tax,  13 porsiyento usab ang usbaw sa real property tax, 25 porsiyento ang  sa community tax, ug ang occupational  tax nakakolekta usab   sila og P973,663, 414. 60

Nunot niini si Cortes miingon nga iyang awhagon ang  konseho sa dakbayan nga mopalabang og ordinansa nga mag-awhag sa mga kompaniya o mga pabrika nga hatagan  nila  og  luna ang mga Mandauehanon nga PWD nga  makatrabaho  sa  ilang  mga buhatan.       

Dugang pa niya nga isip mayor  gipakita  niya  pagpanguna  sa siyudad nga  may   leadership by example   pinaagi  sa pagpatrabaho   sa  mga PWD sa Mandaue   aron may  basehanan  sila sa  ilang  panginabuhi. (/WC)  (BANAT NEWS)