Molimos sa makililimos dakpon

CEBU, Philippines - Subli  nga mipasidaan  sa  publiko ang  mga  opisyal sa  Cebu City Anti-Mendicancy Task Force (CCAMTF)  nga dili  mohatag  og  limos  sa mga  makililimos  nga anaa  sa  mga aseras  ug  sa  mga sakyanan  ning  siyudad.

Ang maong pasidaan  gihimo  ni Isabelita Ganub, ang hepe  sa CCAMTF  human  niya  masayri  nga  basta Decembre  daghang  mga  makililimos  nga dili  taga  dakbayan  sa Sugbo  ang  mosuroy  nganhi  aron magpakilimos.

Midugang  siya  nga  tungod  kay  mag-abot  ang  daghang  tawo  nga mamasko  ug  mosaksi  sa Sinulog  sa  ikatulong Domingo  sa Enero, 2013, ang  maong  mga  makililimos  mopahimulos  sa maong  higayon  ug  unya  na  manglayas  inigkahuman  na  ning  maong  mga  kalihokan  dinhi  sa dakbayan.

Gipadayag ni Ganub nga taud-taod na nga nakaalerto karon ang iyang buhatan ug nakig-alayon  usab siya sa Prevention Restoration Order Beautification and Enhancement (Probe)  .

Midugang siya nga nagkuwang  sa manpower ang  CCAMTF busa nangayo siya og suporta   sa ubang mga buhatan sa City Hall nga adunay daghang staff.

Nasuta  niya  nga  mosiaw  ang  maong  mga makililimos  kun  makasapi  sila  og  daghan  ilabi  na kun  daghan  ang  molimos  kanila.

“Dili gyud na sila hatagan, mao gyud among hangyo sa katawhan,  kay kung hatagan na sila, mogara man pud na sila og pakilimos,” matud pa ni Ganub.

Matud pa ni  Ganub nga  sa  pagmonitor  nila  ilang nasuta nga  adunay mga makililimos gikan sa Mindanao nga modayo gyud dinhi sa Sugbo kung adunay mga dagkong okasyon sama sa Sinulog.

May  mga  gikan  usab  sa nagkalainlaing  lungsod  ning  lalawigan  sa Sugbo, matud pa  ni  Ganub.

Matud pa niya nga ang uban niini giingong nangabot na sukad   sa Pasko  ug gituohan nga magbilin ang maong mga makililimos hangtud na liwas sa Sinulog.

Nagkanayon si  Ganub nga adunay ubang makililimos ang magminaro sanglit ang iya rang grupo ang bantayan ug daling manago sa higayon nga aduna sila’y himoong  operasyon sa kadalanan.

“Magpatabang usab kami sa mga opisyales sa barangay, nga kung makabantay sila nga dunay manglilimos sa ilang lugar, ilaha gyud kana nga badlongon,” matud pa ni Ganub.

Base sa City Ordinance 1631  multahan og  P1,000  kadtong madakpan  sa akto nga mohatag og limos sa makililimos.  (/WC)  (BANAT NEWS)