Bureau of Custom nag-red alert

CEBU, Philippines -  Red alert status karon ang mga sakop sa Customs Intelligence and Investigation Services (CIIS) ug Enforcement and Security Services (ESS) Customs Police sa  Port of Cebu ning panahon sa pagsugat sa Bag-ong Tuig.

Kini ang giluwatang pamahayag ni Maj. Camilo Casculan Jr. ang District Commander sa ESS Customs Police sa Port of Cebu sa pakighinabi sa Banat News.

 Matud pa ni Maj. Casculan  nga  matag pasko ug Bag-ong Tuig bisan ang uban nilang mga personnel nagbakasyon apan “on call” ang tanan gumikan kay gipaubos nila sa red alert status ang bulan sa Disyembre.

Kini aron malikayan ang mga panghitabo sama  sa miaging panahon nga adunay mawagtang nga mga kargamento nga walay dukomento   nga  gipalusot  sa aduana.

Sa milabay’ng mga tuig, atol sa kasaulogan sa pasko adunay barko nga ubos sa litigasyon   nga nawagtang  lang  og  kalit gikan  sa dapit nga   gipundohan niini bisan pa sa presensiya sa mga sakop sa Customs Police.

Hinuon ang mga nalambigit   sa maong  binuang  natangtang na sa serbisyo ug   may uban  pa  nga  padayon pa  nga giimbistigar  sa korte  ug suspendido  sa trabaho, sumala  ni  Casculan.

Midugang  siya  nga  may panghitabo nga sa pagsaulog sa Bag-ong Tuig nagsaulog usab ang mga smuggler og bugas kay gipagawas  kini  og  kalit  gikan  sa Cebu International Port (CIP) pinaagi  sa pagpalusot  sa  mga   dukomento.

Gumikan niini gibahin ni Maj. Casculan ug   ni Atty. Rey “Coco” Hulganza, ang CIIS Chief sa Cebu, ang ilang mga sakop nga moserbisyo panahon sa pasko ug Bag-ong Tuig ug  ang  ubang  kawani  ug  opisyal gipaubos  sa “on call”  aron bisan  anaa  sila  sa balay  o kaha  suroy-suroy matawgan  dayon kun  may mga  alarma sud sa aduana. (WC)(BANAT NEWS)