Sikyu gikawatan sa iyang armas
CEBU, Philippines - Usa ka gwardiya ang naminghoy nga nagpa-blotter ngadto sa Talisay City Police Station sa barangay Poblacion human kini kawati sa iyang service firearm niadtong Biyernes sa kaadlawon diha sa establisamento nga iyang gibantayan sa barangay Bulacao, Talisay.
Ang biktima mao si Manfred Rebeca Samson, 36, taga North Poblacion, lungsod sa San Fernando.Si Samson sakop sa Pyramid Security Agency ug nadestino diha sa Hi Precision sa barangay Bulacao, Talisay.
Nakuha sa wala mailhing kawatan gikan sa biktima ang 9mm nga pistola nga dunay serial number nga 9800332 ug dunay unom ka buhing mga bala ug usa ka kabhang, usa ka Nathaniel knapsack nga dunay sulod nga pitaka diin sulod niini ang Philhealth ID, TIN card, SSS claim stub ug kwarta nga P670.
Giingong ang maong gwardiya wala kabantay nga gikuha sa kawatan ang maong service firearm nga gibutang diha sa usa ka drawer sa guard house.
Kahinumduman nga sa milabay’ng mga buwan usa ka duty guard usab sa Hi Precision ang gikawatan sa iyang service firearm sa mga menor de edad nga taga sitio Mananga sa Tabunok, nabawi hinuon kini sa kapolisan.
Gawas sa maong mga gwardiya laing gwardiya usab sayo niining tuiga ang nakawatan sa iyang service firearm nga shot gun samtang nakatulog kini. (EIM)(BANAT NEWS)
- Latest
