Bagyong Quinta

CEBU, Philippines -  Coastal barangays sa Tuburan gustong mag-deklarar og state of calamity

 Mga barangay nga nahimutang sa daplin sa kabaybayonan sa lungsod sa Tuburan  sa lalawigan sa Sugbo nga nakasinati og kadaut sa pag-igo sa bagyong Quinta gitinguhang ipaubos sa state of calamity.

Kini ang nasayran sa Banat News kang Ajello Allego nga maoy coordinator sa Municipal Disaster Risk Reduction and Management Council dihang nahinabi niadtong miaging adlaw.

Giila niya ang mga barangay nga naapektohan sa bagyong Quinta mao ang Bagasawi, Potat, Apolan, Daanlungsod, Poblacion 1, Poblacion 3, Poblacion 4, Poblacion 6 nga pulos nahimutang sa daplin sa kabaybayonan sa maong lungsod nga maoy nasugamak sa kadaut sa kusog nga paghuros sa bagyong Quinta nga miigo sa miaging semana.

Matud pa niya nangatumba ang mga kahoy, lubi, saging ug pipila usab ka panimalay ang nangaguba dihang kalit nga mihuros ang nagpanaghoy nga hangin tungod sa kakusog niini.

Dugang pa niya nga nagtinguha unta ang mga sakop sa konseho sa lungsod sa pagpahigayon og special session alang sa pagdeklarar nga state of calamity area ang maong mga barangay.

Apan wala makaabot sa saktong gidaghanon ang mitambong nga mga konsehal maong wala mahinayon ang pagtuki sa ilang rekomendasyon.

Gitataw niya nga ilang gikasabotan nga ang mga barangay kapitan na lamang ug ang sakop sa konseho sa barangay maoy modeklarar nga state of calamity area aron magamit usab ang ilang calamity fund sa barangay alang sa ilang panginahanglang galastohan.

Gipasabot niya nga ang kagamhanan sa lungsod andam usab gihapon sa pag-ayuda kun ang maong mga barangay madeklarar nga state of calamity area. (EIM)   (BANAT NEWS)