Most wanted sa Lapu’ napusilan

CEBU, Philippines - Mohatag og P50 mil nga pahalipay si Lapulapu City Mayor Paz Radaza sa tawong nakahatag og impormasyon ngadto sa kapolisan nga miresulta sa pagkasikop sa usa ka most wanted criminal sa siyudad sa Lapulapu.

Matud pa ni Radaza nalipay kini sa kalambuan sa maong kaso nga miresulta sa pagkasikop kang Demetrio Malingin,  nga gikonsederar most wanted sa dakbayan sa Lapulapu.

Sayo niini, si Radaza misaad ngadto sa kapolisan sa paghatag og ganti balor 50 mil ka pesos sa makahatag og impormasyon alang sa pagkasikop ni Malingin.

Sa milabay’ng adlaw mga residente sa Brgy. Bankal mitaho sa kapolisan nga si Malingin nasigpatan sa ilang dapit.

Sila si Chief Insp. Conrado Manatad, ang hepe sa Mactan Police sub-station ug mga sakop sa Special Weapons and Tactics daling misusi sa impormasyon dala ang Warrant of Arrest nga giluwatan ni RTC Lapulapu City Judge Victor Teves batok ni Malingin.

Atol sa maong pagsikop ni Malingin misukol kini sa kapolisan hinungdan nga napusilan kini sa iyang walang batiis hinungdan sa pagkasikop niini.

Nakuha sa posesyon ni Malingin ang lima ka paketeng may sulod nga gidudahang shabu ug P14 mil nga gituhoang halin sa pagpamaligya niini og illegal nga drugas.

Gidala si Malingin sa Mactan Doctors Hospital ug hugot kining gibantayan sa kapolisan.

Lakip sa padayong gipangita sa kapolisan mao ang mga igsuon ni Malingin nga sila si  Jay ug Deo nga kauban ni Demetrio sa pagpangrakrak sa panimalay ni Jerry Aying ug mikalas kini sa kinabuhi sa asawa niini.

Kahinumduman nga si Demetrio Malingin maoy gitumbok nga mirapido sa panimalay ni Jerry Aying sa Brgy. Mactan niadtong Hunyo 2012 nga miresulta sa kamatayon ni Prima Aying nga asawa ni Jerry.

Si Malingin adunay laing kaso sa pagpamusil ug usa sa gitumbok nga notadong drug pusher sa dakbayan sa Lapulapu ug nahimong most wanted sa dakbayan sa Lapulapu. (/EIM) (BANAT NEWS)