Hepe sa Argao police pasidunggan
CEBU, Philippines - Ang Cebu Provincial Police Office morekomenda sa Police Regional Office (PRO)-7 sa paghatag og Medalya ng Kagalingan ngadto ni Insp. Alejandro Batobalonos, hepe sa Argao Police Station, human sa malampuson niining napatahan ang hostagetaker nga si Michael Villamora.
Si Villamora mi-hostage sa iyang asawa ug anak tungod kay nagdumili kini pagpadakop sa kapolisan subay sa warrant of arrest sa kasong murder ug frustrated murder nga giatubang.
Si Sr. Supt. Patrocinio Comendador, director sa CPPO miingon nga maayo ang gihimo ni Batobalonos.
“He showed a good job in negotiating the suspect and he deserves an award,” matud ni Comendador.
Si Michael giingong armado og hand grenade ug .45 nga pistola nga anaay usa ka magazine nga dunay walo ka buhing bala mitahan human sa tulo ka oras nga negosasyon.
“Wa koy plano nga makahimo og kadaut sa kadaghanan giunungan lang ko sa akong asawa kay kahibalo siya unsa akong problema,” matud ni Michael. Nasuta nga si Michael adunay mga kasong rape ug attempted rape.
Si Jinky mibutyag nga nahadlok lang usab siya nga biyaan ang iyang bana kay basin kini maghikog.
Mga kasong illegal possession of firearm and explosive lakip na serious illegal detention ang ipasaka batok kang Michael sunod tuig. (BANAT NEWS)
- Latest
