Buenafe mibiya na sa CCPO
CEBU, Philippines - Sugod pa niadtong Disyembre 26 mibiya na si Sr. Supt. Melvin Ramon Buenafe sa iyang katungdanan isip direktor sa Cebu City Police Office ug anaa na nadestino sa Camp Crame.
“We received a memorandum na relieved na si Sr. Supt. Buenafe because of his more than two years stint as director of CCPO,” sigon pa sa labaw ni Buenafe nga si Chief Supt. Marcelo Garbo, Jr., ang director sa Police Regional Office (PRO) 7. Si Garbo mibutang kang Sr. Supt. Mariano Natuel, ang hepe sa Regional Logistics Division sa PRO 7, isip officer-in-charge sa CCPO hangtud makapili ang Selection and Replacement Board sa Camp Crame kung kinsa gyud ang muhulip kang Buenafe.
Matud pa ni Garbo, bag-ohay lang mipahibalo si Mayor Michael Rama nga ang gusto niyang mohulip ni Buenafe mao si Sr. Supt. Noli Romana, ang kasamtangang hepe sa Criminal Investigation and Detection Group sa Rehiyon 12.
“We forwarded a letter to Camp Crame to resolve this. Pending this, Natuel will serve as the OIC of CCPO,” matud pa ni Garbo kinsa midayeg sa katakos ni Buenafe.
“Na-prove na niya na magaling siya. Dalawang Sinulog celebrations at Calungsod (National Thanksgiving Day) ang kaniyang na-manage,” matud pa niya. Ang Sinulog ug ang Thanksgiving Day nagtapok og milyon ka mga tawo sa nagkadaiyang parte sa nasud hasta internasyonal.
Si Buenafe, sa iyang bahin, nagkanayon nga nadestino siya karon sa Public Safety Division sa Camp Crame. Kasamtangan siya karon nga naka-on leave ug nagpreparar na usab para sa iyang bag-ong pwesto.
Ang kanhi hepe sa CCPO ang mubalik sa Cebu karong adlawa ug magpahigayon og press conference sa CCPO para sa iyang parting statements.
Si Buenafe nahimong hepe sa CCPO sa niaging Agosto 2010. Iyang gihulipan si Sr. Supt. Patrocinio Comendador, Jr. kinsa hepe na karon sa Cebu Provincial Police Office. (BANAT NEWS)
- Latest
