“Adik” ug lay minister patay

CEBU, Philippines - Patay ang usa ka gituohang “drug addict” human kini napusilan sa nag-off duty na nga sakop sa Special Weapons And Tactics (SWAT) sa Cebu City Police Office pasado alas-7 sa miaging gabii diha sa sitio Mutra Mohon sa barangay Tisa ning dakbayan.

Ang napusilan mao si Resdie Ivan Omar, 25, nga taga A. Lopez sa barangay Labangon ning dakbayan.

Sa pakighinabi sa Banat News ni SPO2 Reynante Nioda  miresponde siya sa tawag sa mga silingan tungod kay nagbitbit og armas ug granada si Omar.

Sa pagpangita ni Nioda kang Omar iyaha kining nakit-an sa usa ka abandonadong panimalay duol sa nahitaboan.

Apan matud pa dihang kini gisitar ni Nioda giingong kalit lang siya nga gihapsan ni Omar sa gikuptang granada diha sa baba.

Tungod niini napusilan ni Nioda sa iyang service firearm tunong sa dughan si Omar nga maoy hinungdan sa hinanali niining kamatayon.

Si PO3 Geoffrey Gutual sa Homicide Section, mipadayag usab dihang nahinabi sa Banat News nga adunay mga tattoo sa lawas ang biktima nga ilang nasuta mga ngalan sa pipila ka suspected drug personalities sa siyudad.

Nakuha sa kapolisan ang armas sa biktima ug granada, lakip na ang mga drug paraphernalia ug usa ka gituohang pakete sa shabu.

Samtang nakuha sa crime scene ang upat ka kabhang sa kalibre .9mm nga iya ni Nioda. Gisusi pa kung dunay tulubagon si Nioda sa maong hitabo.

Sa laing hitabo sa pagpamusil patay ang usa ka lay minister sa simbahang Katoliko ug naangol ang usa ka babaye dihang kalit lang gipamusil sa wala mailhing lalaking nagsakay og motorsiklo alas-10 pasado sa miaging gabii sa sitio Seaside, barangay Pusok, dakbayan sa Lapulapu.

Ang namatay mao si Arnesito Granada, 46, samtang naangol si Josie Torres, 49,  pulos nagpuyo sa maong dapit.

Si PO2 Winston Ybañez sa Homicide Section sa maong dakbayan mibutyag sa Banat News nga naglingkod  sa gawas sa tindahan niini si Granada dihang giduol sa lalaking nag-angkas gikan sa usa ka motorsiklo ug kalit gipusil.

Si Granada naigo sa dughan, tiyan ug bukton samtang si Torres naigo usab sa iyang paa ug bitiis. Patay na si Granada pag-abot sa Mactan Doctor Hospital sa maong dakbayan.

Wala pa matino sa kapolisan ang motibo sa pagpatay sanglit walay nasayod kung dunay nakaaway ang biktima sa ilang dapit.  (BANAT NEWS)