Duha ka lalaki gipamusil patay

CEBU, Philippines - Duha ka mga tawo ang nabiktima sa buwag nga insidente sa pagpamusil dinhi sa siyudad sa Sugbo niadtong milabay’ng gabii ug kagahapon sa udto.

Sa N. Bacalso Avenue, sa Barangay Bulacao kagahapon sa udto, usa ka Loreto Gabuya, 24, ang nakaangkon og samad pinusilan sa iyang likod, ulo, abaga, ug dughan human kalit gipaulanan og bala sa usa ka lalaking nagsakay og motorsiklong walay plaka.

Matud pa ni SPO1 Ruth Violango sa Homicide Section, dispatser ang biktima sa South Highway sa dihang usa ka-lalaking nagsakay og motor nga walay plate number miduol kaniya ug gipusil siya sa likod.

 “Daghan na daw nadakpan nga kawatan ang mga tanod tungod sa pagreport aning biktima. Posible sad naa ni siya’y nakaaway na kakumpetensiya sa dispatching,” matud pa ni  Violango kinsa midugang nga niadtong milabay’ng semana pa gisuwayan pagpusil ang biktima apan nakaipsot, giingong susama og barog ang gunman sa lalaking mipusil sa biktima sa milabay’ng semana.

Sa laing bahin, patay si Virgilio Camonias, 57, human gipusil sa silingang si Joey Patindol,34, diha sa Barangay Tagbao miaging Miyerkules sa gabii.

Matud pa nga ang biktima nagbitbit og sundang ug gisulong si Patindol sa balay niini. Dihang giablihan sa suspek ang pultahan gikatahong kalit kining gitigbas sa biktima apan ang sundang didto naigo sa bungbong sa balay.

Tungod niini gikatahong gipusil ni Patindol gamit ang kalibre .357 rebolber si Camonias makatulo ka higayon hinungdan sa iyang kamatayon. Ang suspek nadakpan usab sa kapolisan human sa hitabo. (BANAT NEWS)