Pag-imbestigar sa PRO-7 sa GGC Security Agency gisaway

CEBU, Philippines - Gihulagway ni Gov. Gwendolyn Garcia nga usa ka lain nga matang sa pagpangabuso sa katungdanan ang pagpa-imbestigar ni PRO-7 regional director Marcelo Garbo Jr. sa GGC Security Agency nga gipanag-iya ug gidumala sa gobernador.

Matud pa ni Garcia nga lain na usab kini nga pagpang-harass sa kapolisan human sa gihimo niini sa Kapitolyo.

Sumala pa sa gobernador  nga illegal ang pagpaimbestigar ni Garbo sa iyang security agency kay walay basehan ang reklamo nga nakalapas sa balaod.

Gipasabot usab sa gobernador nga ang nahisgutang  security agency nagpadayon sa pag-operate sulod na sa 25 ka tuig nga wala makasugat og kakulian sanglit nagsubay man kini  sa mga rekisitos sa pag-operate og security agency.

Hinuon gitataw sa gobernador nga andam nilang atubangon ang bisan unsa unyang imbestigasyon sa kapolisan kay limpyo man ang pagpadagan sa maong security agency.

Gitumbok sa gobernador nga gipatun-an na sa iyang mga abogado ang legal nga lakang batok ni Garbo.

Samtang gipadayag sa gobernador ang ilang kaandam sa pagtubag sa kasong gisang-at sa kapolisan batok kanila tungod sa pasangil nga pagpanapog sa ulo ni Insp. Alvino Enguito sa miaging semana atol sa pagpatangtang sa mga tents nga gipasilongan sa mga supporters ni Garcia.

Ang kapolisan daan nang miklaro nga igo ra silang misunod sa kung unsay gimando kanila ug kini mao ang pagmentinar sa kahapsay ug kalinaw sa Kapitolyo.

Ang presensya sa bagang duot sa mga supporters sa mga politiko gikabalak-ang makamugna og tensyon ug ang Kapitolyo dili iya sa politiko kondili iya sa publiko  mao nga interes sa tanan nga kini bantayan sa kapolisan. (/EIM) (BANAT NEWS)