P5.2 bilyones 2013 budget sa Cebu City aprubado sa Konseho

CEBU, Philippines - Moabot ngadto sa P5.2 bilyones ang giaprobahang budget sa Konseho sa dakbayan sa Sugbo alang sa tuig 2013.

Nasayran nga P6.7 billion ang giduso nga budget ni Mayor Michael Rama busa moabot ngadto sa P1.5 billion ang deperensya.

Ang konseho miklaro hinuon nga igo ra nila giseguro ang mga labing gikinahanglan sa siyudad.

Samtang si Rama sa iyang bahin nagpasalamat sa konseho gumikan kay gamay lang nalaslas nga  budget alang sa 2013.

Dili sama sa karong tuiga  nga dul-an sa katunga ang deperensya  sanglit ang giduso ni Rama alang sa 2012 moabot ngadto sa P10.8 billion apan P5.2 billion gihapon ang giaprobar.

Matud pa ni Rama nga ang giduso niya nga budget nag-agi og konsultasyon sa miaging mga buwan nga naglakip sa mga proyekto  sa barangay ang angayang hatagan og unang pagtagad.

Misalmot sa konsultasyon kaniadto ang pipila sa mga  opisyales sa barangay, pipila ka mga sektor, mga department heads, mga opisyal sa pampublikong tunghaan sa dakbayan, pribadong sektor ug uban pa aron masuta ang ilang kinahanglanon.

Matud pa ni Rama nga dako og bentaha ang pagpaubos sa konsultasyon sa katawhan sanglit sila mao’y suhito sa ilang mga gikinahanglan. (/EIM)  (BANAT NEWS)