Babayeng gigaid ug giputos og banig gilabay sa dagat

CEBU, Philippines - Giputos sa banig ug gihiktan og pisi ang lawas sa usa ka babaye samtang kini nag-utaw-utaw sa kadagatan sa Barangay Lagundi, Oslob adtong miaging adlaw sa udto.

Ang babaye giingong dili na maila ang nawong tungod kay anaa na kini sa state of decomposition dihang nakit-an sa mangingisda nga si Virgilio Janon nianang ala 1:30 sa udto. Ang babaye gihulagway nga nagsul-ob og gray nga sleeveless shirt, black pedal pants, pink nga underwear, ug gibana-bana nga 5’2” ngadto sa 5’4” ang gitas-on.

Base sa autopsy result ni Dr. Christopher Amit, municipal health officer, nga ang biktima nakaangkon og fracture sa occipital bone niini sa ulo nga maoy hinungdan sa grabeng kadaot sa utok niini. Aduna usab nakita nga senyales nga gituok kini. Gibana-bana nga gipatay ang biktima mga tulo na ka semana ang nakalabay.

Si PO3 Nelson Saquibal, chief investigator, nagduda nga gipatay gyud ang biktima sa dili mumenos usa ka tawo apan dili una sila makatumbok kung gipahimuslan kini sa wala pa patya. “Sa akong tan-aw mura’g gituok ni unya nisuway siguro og lugnot ba unya gibunalan kaha sa ulo,” matud ni Saquibal.

Si Saquibal midugang nga posible sa laing lugar patya ang biktima unya gihagbong kini sa dagat hangtod nga naanod kini sa maong barangay.

Ang polis nakig-alayon na karon sa silingang mga police stations aron sa pagsuta kung adunay nagpa-blotter nga nawad-an og sakop sa pamilya.

Ang lawas dali kining gilubong sa publikong sam-ang sa Oslob.

“I-exhume ra na if naay mangita nga relatives,” dugang pa ni Saquibal. (/EIM)  (BANAT NEWS)