CEBU, Philippines - Pormal nga gipasakaan og kasong robbery ni Gobernador Gwendolyn Garcia ang kapolisan sa Police Regional Office (PRO)7 human gub-a niini ang mga tolda ug mga lingkoranan nga gigamit sa mga supporter sa gobernador atubangan sa Kapitolyo.
Nag-una sa gipasakaan sa maong kaso mao si PRO-7 Regional Director Marcelo Garbo ug mga kapolisan sa Regional Safety Battalion nga gipangulohan sa ilang ground commander nga si Sr. Supt. Leopoldo Cabanag. Sumala pa sa gobernador sa iyang gipanumpaang pamahayag nga walay pananghid ang kapolisan nga miguba sa mga tolda ug mga bangko.
Samtang ang mga abogado sa gobernador mitumbok nga ang kapolisan gihangyo nga iuli ang maong tolda ug mga bangko ngadto sa pribadong tag-iya niini apan wala kini mosanong nga nakapaaghat sa gobernador sa pagpasaka og kaso ngadto sa hukmanan.
Ang maong kaso unang giduso ngadto sa Cebu City Prosecutors Office niadtong Sabado ug misaad ang gobernador nga isunod nila sa pagsang-at ang kasong administratiba batok sa kapolisan.
Samtang sa bahin ni Garbo, gipasabot niya nga katungod sa suspendidong gobernador ang pagpasaka og kiha batok kanila kay demokrasya ang atong nasud.
Matud niya nga igo lang nagtuman ang kapolisan sa ilang katungdanan aron mabantayan ang kalinaw ug kahusay sa palibot ug sa sulod sa Kapitolyo.
Iyang gisubli nga gituman lang nila ang mando sa nasudnong kagamhanan kinsa miila kang acting governor Agnes Magpale nga lihitimong opisyal nga nagdumala karon sa lalawigan sa Sugbo.
Miingon si Garbo nga bisan iya sa katawhan ang Kapitolyo apan gumikan sa pagmagahi sa suspendidong gobernador sa pagbiya gikan sa iyang buhatan, mitanyag og mga pamaagi ang kapolisan nga nagbantay karon sa Kapitolyo sa pagpatuman og limitasyon kutob sa mga tawo nga mosulod sa maong lugar.
Hinuon sa pagkakaron gipaluagan na sa kapolisan ang pag-inspection sa mga tawo nga mosulod sa Kapitolyo ug gipasabot ni Garbo nga walay personalan ang ilang pagpatuman sa balaod. (BANAT NEWS)