Pabuto sa SRP ra ikabaligya

CEBU, Philippines - Gipahimangnoan   ni Mayor Michael Rama  ang mga opisyales sa 80 ka barangay nga kinahanglan nga mokooperar sa implementasyon sa ordinansa nga nagdili sa pagbaligya og pabuto sa bisan asa nga dapit gawas sa South Road Properties (SRP).

Matud pa sa mayor nga adunay katungod ang mga opisyales sa pagbadlong sa mga tawo nga mobaligya og pabuto sa gawas  sa SRP.

Masaligon si Rama nga mokooperar  ang publiko niini alang  sa kaayohan  sa tanan.

Nasayran nga sa umaabot  nga   bisperas  sa Bag-ong  Tuig  labing  modaghan ang  mamalit  og  pabuto. Una na nga mipasidaan ang  Department of Environment and Natural Resources (DENR) nga  dili magpataka og pabuto sa bisan asa nga dapit  gumikan kay mosamot ang  polusyon nga matampo niini sa hangin.

Samtang  ang  konseho  mipasar  usab  kaniadto  og     resolusyon    nga nag-awhag   sa  mga  opisyal  sa barangay  sa pagtudlo og lugar   isip firecracker zone  aron malayo sa disgrasya ang mga tawo. Sa pagkakaron  adunay mokabat  sa 50 ka  stall  nga  namaligya  og pabuto sa SRP   nga  gibantayan   usab sa mga tawo sa City Market Authority.

Gawas  sa maong  lugar dakpon  sa  mga  otoridad  ang  mga  negosyante  nga  mamaligya  og  pabuto.  (BANAT NEWS)