Giligid og tigbas bukton tabas

CEBU, Philippines - Natabas ang bukton sa usa ka   drayber sa traysikad  human  kini tigbasa og  sundang  sa iyang  silingan  didto  sa   sitio Datag, barangay Buagsong sa lungsod sa Cordova  niadtong  Miyerkules  sa gabii  atol  sa pagsaulog  sa Pasko.

Ang biktima mao si Alvin Diongcog,  22 , ulitawo ug  ang suspetsado  mao si Harold Dialde,  alyas Longlong, hingkod ug pulos nagpuyo sa maong dapit.

Si PO1 Roselloso Noem  sa kapolisan sa maong lungsod nga nahinabi sa Banat News miingon nga nagpaabot og pasahero  ang biktima dihang kalit lang giduol sa  suspetsado ug mihangyo nga mohulam sa traysikad nga gipamasaheroan niini.

Tungod  kay mibalibad ang biktima,  nasuko   ang suspetsado  ug nagbagulbol  nga  mipauli  sa ilang  balay.

Apan  sa pagbalik  niini may  dala  na  nga sundang ug  sa  walay  pupanagana  gihapsan  sa iyang sundang ang  naglingkod  nga  biktima.

Dali nga nakaikid   ang  biktima  apan  gigukod  kini  sa suspetsado  ug giligid  og  tigbas  hinungdan  nga  samdan  ang  duha  ka bukton  sa biktima.

Si PO1 Noem   nagkanayon dihang  nakita  sa  suspek  nga  mitabisay  na  ang  dugo  gikan  sa bukton  sa biktima  nagdali  kining  mibiya sa  maong  lugar  samtang  gihatud  usab  dayon  ang  biktima  ngadto sa  Vicente Sotto Memorial Medical Center sa dakbayan sa Sugbo.

Sa pagkakaron padayon  pang  gipangita sa kapolisan  ang  suspetsado. (BANAT NEWS)