Tudlo nalaksi sa pabuto

CEBU, Philippines - Upat ang angol nga naglakip sa 13 anyos nga lalaki  kansang tudlo nalaksi human mabuthi sa pabuto  niadtong Lunes sa gabii bisperas sa Pasko.

Si PO1 Adler Gomez sa operations branch sa Cebu  Provincial   Police Office (CPPO) miila  sa nalaksian  og  tudlo   nga  si Benedict Labarijas, 13, taga sitio Hollow Block, barangay Tabunok, dakbayan  sa Talisay.

Ang  biktima  giingong  mipunit  sa mipalyar  ug mikagar  nga whistle bomb   apan  dihang  iya  kining gikuptan  kalit  lang mibuto   busa   nalaksi ang iyang tuong tudlo  ug gidali pagdala  ngadto sa Talisay City District hospital.

Samtang sa pagka ala 1:30 sa  kaadlawon  sa  adlaw  sa Pasko usa ka Rodrigo Diaz, 45, minyo,  nga  taga sitio Sangi, Tabunok Talisay City  gihapon  nagsangkiig  dihang  napisok   ang  iyang  hawak  sa usa  ka saag  nga   kuwetis  ug  nalandig  usab  sa tambalanan  sa Talisay, nga taga Lapulapu St., Suba Danao City  ug nadistino  sa Central Command.

Si PO3 Reynaldo Perez sa Danao City Police  Station miila  sa  unang  nasamdan  sa pabuto  sa maong  dakbayan  mao  si  Lydia Dumayag, 74, taga Lapulapu Street, barangay  Suba, dakbayan  sa Danao. 

Ang  maong biktima maoy  inahan  ni PO3 Rowena Dumayag, hingkod, usa  ka  opisyal  sa Philippine  Navy  nga  nag-alagad  sa Central Command. Sumala  ni PO3 Perez  nga  nangaon sulod sa ilang compound  ang  biktima  uban  sa mga  sakop  sa pamilya  niini  samtang nagpaabot sa pagsugat sa Pasko  dihang  kalit lang mitugpa   ang  whistle bomb  ug  mibuto  sa  tuong tiil  sa  biktima  sa  alas 7:00   ang takna  sa gabii.

Pagka alas 7:30 laing nabuthan  sa  whistle bomb   gihapon mao  si Sigfred Tito, hingkod, taga barangay Suba, dakbayan  sa  Danao   kansang  kamot  maayong  pagkasunog  ug  napaksit  dihang  pagdagkot  niya  sa whistle bomb  kalit  lang  mibuto   nga wala  pa  ikalabay  sa yuta.

Sa paghimo ning balita kagahapon wala pay napadangat sa CCPO nga spot report   kalabot  sa nagrabihan   o kaha  nakabsan  sa  kinabuhi  gumikan  sa pabuto niadtong  bisperas  ug  sa adlaw  mismo  sa Pasko.

Samtang  giisip  sa kapolisan  nga  hapsay ug  malinawon ang  pagsaulog  sa Pasko sa  lalawigan  sa Sugbo,  nahimuot  usab  sila  kay dili na kaayo  daghan  ang  nabuthan   sa mga  firecrackers  ug  gituohan  nila  nga   ingon  usab  niini  ang  ilang  masaksihan sa bisperas  sa Bag-ong Tuig. (BANAT NEWS)