Kapolisan higpit nga nagbantay sa pabuto

CEBU, Philippines - Gikalipay sa mga mamaligyaay og pabuto sa dakbayan sa Mandaue nga  gitugotan na  sila nga   makaladlad  og  pabuto  sa  firecracker zone area   sa dakbayan  niining  nagkaduol na ang Pasko ug Bag-ong Tuig

Ang pagtugot naggikan  kang  City Fire Marshall Ronaldo  V.  Orbeta   kinsa  mideklarar sa bakanteng luna nga nahimutang duol sa bag-ong merkado publiko sa sitio Tribunal sa barangay Centro,   sa maong dakbayan  nga firecracker zone area.

Si  SFO1 Sherwin Porsia, hepe  sa  Fire Safety Enforcement Section sa Bureau of Fire Protection (BFP)sa maong dakbayan nga nahinabi sa mga tigbalita miingon nga ang maong dapit maoy labing luwas alang sa mga  baligya   nga  pabuto  kay  layo  na  kini  gikan  sa kabalayan.

Apan  mipasidaan  siya  nga  kutob  sa  mga  pabuto nga  ibaligya sa gawas  sa firecracker  zone  dili  sila  magpanuko  sa  pagsakmit  niini.

Naglakip sa mga pabuto nga gitugot nga ikabaligya sa firecracker zone area mao ang baby rocket, bawang, gagmay nga mga triangle, pulling string, paper clips, El Diablos, watusi ug Judas Belt.

Si Porsia miingon nga gihimo usab nila nga ang Iuwas paputok seminar sa kabarangayan sa pagsiguro nga dili na masubli ang nahitabo sa   miaging  Disyembre  2009   sa maong  dakbayan nga kalit  lang  miulbo sa kapin sa 50 ka mga tindahan sa pabuto ug milakas sa kinabuhi sa usa ka mabdos nga babaye, duha ka mga bata ug unom usab ka hingkod na ang panuigon ang nangaangol.

Samtang  sa dakbayan  sa Talisay   higpit  usab  nga gipatuman  sa kapolisan  ang  firecracker zone  diin  kutob  sa mamaligya  og  pabuto   sa gawas dakpon  ug  silotan.

Matud  pa  ni Insp. Rio Hugo  sa Talisay  City Police Station  nga ang  gitudlo  nga  firecracker zone  sa dakbayan  nahimutang sa barangay  Lagtang.

Matud  pa  ni  Ipong  nga  magpadayon  ang  ilang  pagmonitor sa dagan  sa binaligyaay  og  pabuto  hangtud  sa liwas  sa bag-ong  tuig.

Midugang  si Ipong  nga  dili  siya gusto  nga  mahitabo  pag-usab  ang  insidente  sa  miaging  tuig dihang  usa  ka hapag  nga  pabuto  nga  giladlad  sa sidewalk  sa Tabunok  ang  nabungkag  dihang  miulbo  kini  kay  gilabayan  og  upos  sa sigarilyo  sa tawo  nga wala  hiilhi.  (BANAT NEWS)