3 ka dagkong opisyal miduaw kang Garcia

CEBU, Philippines - Ang suspendidong gobernadora nga si Gwendolyn Garcia nakadawat og moral nga suporta gikan sa tulo ka mga dagkung lider sa nasud.

Kagahapon si kanhi presidente Joseph Estrada, Bise Presidente Jejomar Binay, Senate President Juan Ponce Enrile ug kanhi  senador Ernesto  Maceda miduaw  kang Garcia  sa Kapitolyo sa pagpakita sa ilang moral nga suporta niini.

Si Garcia nagpabilin sa iyang buhatan sa Kapitolyo sukad pa niadtong Miyerkules human ikasilbi  ang iyang suspension order.

“I am here to give support for the governor. She is responsible for Cebu’s progress. I hope all the Cebuanos will support her too,” ni Estrada pa.

Si Garcia nagkanayon nga ang suportang gihatag sa tulo ka mga dagkung lider sa nasud naghatag usab kini og tingog sa mga Cebuano kinsa dili makasulti sa ilang suporta ngadto kaniya.

 “It has further strengthened my faith in Him. His ways we may not understand, but I trust in Him. In behalf of the Cebuanos, we thank you  Vice President Binay, Manong Johnny and Pangulong Erap for taking up the cause of the Cebuanos,” ni Garcia pa dihang gipangutana kini sa mga sakop sa media kabahin sa pag-abot sa tulo ka mga lider.

Si Garcia nagkanayon  nga tungod kay  usa siya ka napiling gobernador sulod   sa  tulo ka termino, dili siya motuman   sa illegal nga order.

Ang buhatan sa presidente sa nasud maoy miluwat sa nahisgutang  mando sa pagsuspenso kang Garcia  nunot sa kasong “usurpation of authority” nga gipasaka kaniya ni anhing Bise Gobernador Gregorio Sanchez Jr.

Subay niini si House Speaker Feliciano Belmonte gikatahong moadto usab sa Kapitolyo  apan wala  hisayri  kanus-a.

Sa text message ni Belmonte sa The Freeman (igsuong publication sa Banat News) nagkanayon  nga “Manong Pabling (Pablo Garcia nga amahan sa gobernadora) is my friend but local problem yan. Wouldn’t want to be involved”.

Sa laing bahin, gipaniguro ni Acting Vice Governor Agnes Magpale ngadto sa katawhan sa probinsiya sa Sugbo nga mosubay siya sa balaod bisan pa sa padayong pagmagahi ni Garcia sa pagkanaog sa Kapitolyo.

Gipangutana  sa   taga media unsay  iyang  isulti  kun  mangutana kaniya  si  Presidente Aquino  bahin  sa kahimtang  karon sa Kapitolyo, siya miingon  nga  “I will tell the President not to worry. I am in control of everything here. I am on the top of the situation”.

Samtang si Garcia sa iyang bahin, lig-on usab kini sa iyang baroganan   nga  dili manaog sa Kapitolyo tungod kay alang kaniya siya gihapon ang gobernador sa lalawigan. (BANAT NEWS)