Rerouting sa PUJ sa Mandaue ipatuman

CEBU, Philippines -  Ang pagpaluag sa mga sakyanan sa kadalanan sa dakbayan sa Mandaue maoy unang  tumong  sa gipatuman    nga  dry run  alang  sa usa  ka  hingpit  nga rerouting  nga molungtad sulod  60 ka adlaw.

Nunot niini si Konsehal Elstone Dabon nga maoy chairman sa committee on transportation sa kagamhanan sa maong dakbayan  mipalabang sa  usa ka resolusyon alang sa  pag-usab  sa rota sa   mga PUJ nga nagbiyahian sa dakbayan sa Sugbo, Lapulapu ug sa amihanang bahin nga kalungsoran sa lalawigan sa Sugbo.

Sa maong re-routing   ang  mga  PUJ nga  gikan sa dakbayan sa Sugbo  moliko sa dalan A.S.  Fortuna ug mosulod sa J. Mall Center Terminal ,ug dayon mosubay  sa dalan Albano ug moliko sa dalan M.L. Quezon Avenue sa barangay Maguikay , dayon  moliko sa ilawom sa flyover ug mopaingon sa dalan M.C. Briones, dayon  mosubay  sa Ibabao Estancia ug mobalik sa naandan nga agianan  balik  sa dakbayan sa Sugbo.

Mao usab ang pagahimoon sa mga sakyanan nga pasaheroan gikan sa dakbayan sa Lapulapu nga moliko gikan sa dalan A.S. Fortuna ug mosulod sa J. Mall Center  sa barangay Bakilid , dayon moliko sa dalan Albano ug M.L. Quezon sa barangay Maguikay sa pagbalik paingon na sa dakbayan sa Lapulapu.

Ang dili makaliko sa dalan A.S. Fortuna mao  ang mga biyahe gikan sa dakbayan sa Sugbo nga mga  PUJ  nga  21A   nga rota  tungod kay adto man kini mosubay sa dalan A. del Rosario ug mopaingon sa Parkmall  ug Cebu International Convention Center (CICC) agi   sa bag-ong merkado publiko sa reclamation area sa maong dakbayan.

Ang buhatan sa Traffic Enforcement Agency of Mandaue (TEAM) nga gipangulohan ni Erwin Ermac nga maoy executive director maoy gitahasan sa pagtuon ug  paghimo  sa iyang rekomendasyon sa traffic board sa dakbayan alang sa hingpit nga  pagduso sa  usa  ka ordinansa nga maoy mohingpit sa balaod  bahin  sa permanenteng agianan  sa mga sakyanan nga pasaheroan. (WC) (BANAT NEWS)