Dalaga giulo pagpusil patay

CEBU, Philippines -  Patay nang napalgan ang usa ka dalaga nga naglunang sa kaugalingong  dugo nga adunay samad pinusilan sa ulo didto sa Sitio Banilad ,barangay Tumonoy, lungsod sa Moalboal niadtong Biyernes sa alas 4:00 sa kaadlawon.

Ang biktima nailhan sa kapolisan  pinaagi sa iyang identification card  nga si April Mae Timpoloc Labayan, hingkod ,   nga taga Babag, siyudad sa Lapulapu.

Subay sa spot repot nga giduso sa Moalboal Police sa Operations Branch sa Cebu  Provincial  Police  Office (CPPO)  nga  nagpakita nga nakit-an na lang ang biktima nga patay na ug naglunang sa dugo nga dunay samad pinusilan   sa ulo  nga  nagbuy-od sa sala sa usa ka   balay  sa maong lugar.

Wala usab matino kun si kinsa ang tag-iya sa balay diin makaplagi ang patay’ng lawas sa biktima. Nahimong tigmo  karon  sa kapolisan  nganong  nahiabot  kining  maong  biktima  didto  sa maong  lugar  nga  unta  taga  Lapulapu  man  siya.

Si PO3 Maximo Cuyacot sa Operations branch sa CPPO niingon  nga ang biktima nailhan kini sa mirespondi nga mga polis tungod sa iyang I.D.   sa  sulod sa iyang  pitaka.

Gisuwayan pa unta nila og tabang ang biktima   ug gihatud sa tambalanan apan ang municipal health doctor nga si Dr.Cesar Mahinay mideklarar nga kini patay na.

Gipaubos sa autopsy ang patay’ng lawas sa biktima aron pagtino sa hinungdan ug pagtumbok sa motibo ingon  man  suspek sa krimen.

Naglisud usab kita pagkuha og dugang detalyi  sa imbistigasyon sa maong hitabo sanglit guba ang telepono sa kapolisan sa lungsod sa Moalboal. (WC) (BANAT NEWS)