Mga armas sa kapolisan sa MCPO gitaptapan

CEBU, Philippines -  Higpit nga gimando sa tanang sakop sa kapolisan sa Mandaue City Police Office (MCPO) ang pagdili sa pagpabuto sa armas sa panahon  sa Pasko ug Bag-ong Tuig nunot usab sa traditional muzzle taping of  firearms nga gipatuman.

Si Senior Superintendent Petroneli Baldebrin, direktor sa MCPO niadtong miaging adlaw maoy nangulo sa pagbutang og packaging tapes sa sumbohan sa mga armas sa mga polis sa headquarters ug gisunod usab ang unom ka mga presinto niini.

Ang mga packaging tapes gipirmahan sa ilang mga hepe aron dili sila matintal pagpabuto niini panahon sa kapaskuhan ug sa pagsugat sa bag-ong tuig.

Gilikayan sa kapolisan nga dunay maigo sa mga saag nga bala tungod sa indiscriminate firing sa mga armas.

Tuyo sa kapolisan nga pinaagi sa pagtaptap sa mga sumbohan dili usab magpabuto ang mga tawong nanag-iya og armas aron dili makaigo og inosenteng mga tawo. (/EIM)  (BANAT NEWS)