Way bagyo sa Pasko

CEBU, Philippines - Ang Philippine Atmospheric Geophysical and Astronomical Services Administration (PAGASA) miklaro nga walay bagyo o mga weather disturbance nga maabot dinhi sa Pilipinas sa mga mosunod nga semana.

Sa miaging adlaw, ang weather bureau mihatag og warning nga dunay formation sa usa ka tropical cyclone nga moigo sa sama gihapong mga lugar nga naapektuhan sa super typhoon Pablo sa Visayas ug Mindanao sa adlaw sa Pasko.

Si Alfredo Quiblat, officer-in-charge sa Cebu PAGASA Complex Station, nagkanayon nga ang low pressure area (LPA) adunay gilay-on nga 2,000 kilometers gawas sa Philippine Area of Responsibility (PAR).

“Layo pa gyud kaayo ni siya and adunay indication nga nihinayhinay kini but kung naa pa gani ni sa tubig, adunay possibility nga mokusog. Pero slim kaayo ang possibility nga mamahimo ning typhoon,” matud pa ni Quiblat.

Dugang pa niya nga aduna pay daghang mahitabo una mamahimong bagyo ang usa ka LPA kung makasulod man galing dinhi sa Pilipinas, moagi pa kini sa usa ka active tropical depression ug daghan pa.

Gitataw ni Quiblat nga walay angay ikahadlok nga adunay lain nga makahiagum og laing kalamidad kay kung makasulod man gani ang LPA sa PAR, nipis ra kaayo ang chance nga mamahimo kining super typhoon parehas sa Pablo.

“Kung i-compare sa Pablo, layo ra gyud kaayo. Aduna tay model kung magpabilin gani siyang LPA, adunay possibility nga mo-enter siya sa PAR by December 23 apan mamahimo pod ni siyang mo-dissipate,” matud pa ni Quiblat.

Dugang niya nga kusog na gyud to daan ang Pablo bisan  atoa pa kini gawas sa nasud itandi niining ilang gi-monitor karon.

Ang bagyong Pablo, maoy labing kusog nga bagyong miigo sa Pilipinas karung tuiga, diin nikalas kini og kapin sa libong mga kinabuhi ug liboan nga mga pamilyang nawad-an og panimalay.

Adunay pag ulan-ulan nga masinati sa Eastern Visayas ug Mindanao sa mosunod nga mga adlaw tungod sa Inter-Tropical Convergence Zone (ITCZ).   (BANAT NEWS)