Daghang brgy. kapitan mi-absent sa ABC meetings

CEBU, Philippines - Moabot lang ngadto sa 48 ka mga sakop sa Barangay Councils (ABC) ang nitambong sa ilang tigom kagahapon ug gidungog nga ang uban adto mitambong sa kalihukan sa Team Rama.

Nasayran nga kandidato pagka-konsehal sa north district ubos sa Bando Osmeña Pundok Kauswagan (BOPK) ang pangulo sa maong kapunongan nga si Kapitan Michael Ralota sa Barangay T. Padilla.

Apan si Mayor Michael Rama misaysay nga dili niya sala kung gamay ang nanunga sa tigom sa ABC gumikan kay wala siya nagpugong sa mga kapitan nga motambong sa maong tigom.

Giklaro hinuon ni Rama nga wala siya’y tigom nga gipahigayon kagahapon sa mga kapitan.

“Ang mga kapitan aduna na sila’y katungod, dili pud na nako sala kung dunay ubang kaalyado nila ang mobalhin nako,” matud pa ni Rama kinsa misaysay nga duna nay ubang opisyales sa barangay nga kanhi supporter sa BOPK ang mitapon karon sa Team Rama.

Apan ang iyang kandidato pagka-kongresista sa south district nga si Atty. Aristotle “Totol” Batuhan giingong adunay kalihukan sa mga opisyales sa barangay.

Si Batuhan sa iyang bahin miklaro nga wala niya atbangi ang tigom sa ABC gumikan kay sa miaging buwan pa naka-schedule ang iyang kalihukan sa mga opisyales sa barangay.

Dugang pa ni Batuhan nga wala siya masayod kaniadto nga nataymingan kini sa tigom sa ABC.

Gitataw usab ni Batuhan nga wala usab niya pugsa ang mga opisyales sa barangay  sa pagtambong sa gi-organisar niya nga kalihukan sanglit duna man sila’y katungod nga mamili kung asa sila motambong.

Nasayran nga diha sa maong tigom sila si south district Rep. Tomas Osmeña ug ang nagpasubling kandidato sa north district nga si Raul del Mar. (BANAT NEWS)