Tensyon sa capitol

CEBU, Philippines - Opisyal sa polis nga nagbantay sa Kapitolyo gidapog.

Mitumaw ang tensyon atubangan sa Capitol Building dihang gisugdan pagtangtang sa kapolisan ang duha ka dagkong tents nga maoy gipasilungan sa mga suporters sa suspendidong gobernador nga si Gwendolyn Garcia. 

Ang maong insidente nahitabo sa dihang gisugdan na sa kapolisan ang pagtangtang sa mga dagkong tents subay sa kamandoan sa Police Regional Office-7.         

Ang team leader sa augmentation nga si Inspector Alvin Enguito gikatahong kalit lang nga giduol sa usa ka lalaki nga iyang gihulagway nga ‘dakoon og lawas’ ug kalit siyang gidapog niini gikan sa iyang likod.          “Miduol siya og kalit nako unya gihapak akong luyo, miana siya nga nganong instruct -instruct man ka diha?” pasabot pa ni Enguito.          Tungod sa ilang ka-busy sa ilang pagpanangtang sa mga tents wala na panumbalinga ni Enguito ang pagbastos sa iyang pagkapolis sa maong tawo.

Ang maong hitabo nakuha sa video footage sa mga tigbalita diin usa ka lalaking nagsuot og polo shirt nga kolor blue ang midapog kang Enguito bisan nagsuot pa kini og uniporme sa kapolisan.

Ug dihang nahuman na sila sa ilang gibuhat ilang gipangita ang maong lalaki  apan wala na kini sa maong area.          Mipasabot si Enguito nga igo lang silang mituman sa kamandoan sa ilang labaw. Ug gilikayan nila nga dunay mahitabong kagubot hinungdan sa gipatumang maximum tolerance.

Diha sa pundok sa mga tawo nga naapil sa komosyon atol sa pagpanghipos sa Regional Public Safety Battalion-7 ang anak sa gobernador nga si Paolo.

Mipasangil ang mga supporter ni Garcia nga pagpanghasi ang gibuhat kanila sa kapolisan.

Samtang si Garcia nasagmuyo sa nahitabo “mura man og wala na lang gyud koy maayong nahimo, dili lang sa mga Sugboanon, kondili apil na sa kapolisan,” matud pa sa gobernador sa mga tigbalita.

Samtang sa laing bahin, mipahigayon og courtesy call ang kadagkuan sa Police Regional Office (PRO-7) ngadto sa buhatan ni Acting Governor Agnes Magpale.

Si Chief Supt. Marcelo Garbo Jr. ang director sa kapolisan sa rehiyon mipasalig nga subay sa balaod, mosuporta ug mohatag og security kang Magpale ang kapolisan kun gikinahanglan.

Ug tungod sa nahitabong komosyon diha sa atubangan sa Kapitolyo gipadayag ni Garbo nga dili layo ang posibilidad nga mogamit sila og pwersa aron pakanaogon si Garcia sa iyang katungdanan.

Ang PNP ilawom sa superbisyon sa Department of Interior Local Government (DILG) ug nag-agad kini sa kamandoan sa maong ahensya kung unsay sunod nga buhaton.  (BANAT NEWS)