Gov. Garcia : “Over my dead body!”

CEBU, Philippines - Kini ang isog nga deklarasyon sa suspendidong Gob. Gwendolyn Garcia nunot sa pagdumili niya pagtuman sa kamandoan sa pagpasuspenso kaniya.

Padayung giinsister ni Garcia nga illegal ang pagpasuspenso kaniya subay sa gidugayon sa pagpakanaug sa hukom sa Malacañang sukad gitapos sa Department of Interior and Local Government ang imbestigasyon sa kasong administratibang gipasaka ni anhing bise-gob. Gregorio Sanchez Jr.

“I will continue to discharge my function as governor of Cebu, and if they want to stop me, then they have to do that over my dead body,” matud pang Garcia.Si Garcia nakakuha sa suporta sa iyang mga department heads ingon man sa mga mayor, bise mayor ug mga kapitan kinsa mibisita sa iyang buhatan sa Kapitolyo kagahapon. Gipahibawo usab ni Garcia nga may gihimo na silang lakang nga mapugngan ang pagpasuspenso kaniya. Apan si acting Gob. Agnes Magpale mibahad nga mag-atubang og kaso ang mga department heads nga dili motuman sa iyang kamandoan.

“For the record, there's only one Governor (in Cebu) and she's acting Governor Agnes Magpale,” matud pang Magpale.Samtang gikwestiyon sa kampo ni Garcia ang pagpahigayon sa kapolisan og checkpoint alang sa mga tawo nga gustong mopadayag og suporta kaniya sa Kapitolyo.

Matud pa ni Kong. Pablo John Garcia nga Martial Law ang gihimo sa kapolisan ubos sa kamandoan ni DILG Secretary Mar Roxas.

“This time of Martial Law should not continue, mura’g si Mar Roxas nakaminus sa mga Sugbuanon,” matud pang Kong. Garcia.

Giawhag ni Kong. Garcia si Roxas nga dili insultohon ang mga Sugbuanon nga himuong ilegal ang pagbisita sa mga probinsiyano sa Sugbo sa Kapitolyo.

“Kinsa man siya nganong maghawod-hawod man siya dinhi sa Sugbo?” matud pa niya.

Samtang si Daanbantayan Mayor Mara Luisa Loot isog nga motugot sa iyang mga tawo sa Kapitolyo bisan pa og dakpon kini sa kapolisan.Giawhag usab ni Loot si Magpale nga kalma lang ug dili magdali-dali sa iyang katungdanan.

Ang anak ug abogado sa gobernadora nga si Atty. Christina Garcia-Frasco sa balita sa TV Patrol Central Visayas kagahapon nagkanayon kini nga mosubay sila sa balaod.

Gihulagway ni Frasco nga illegal ang suspension order maong dili kini angayang sundon. Gani matud pa niya sa teknikalidad pa lang sayop na ang DILG sa ilang gihimo tungod kay Xerox copied lang ang dokumentong gipamilit.

Ang kampo sa mga Garcia adto modangop sa Court Appeals moduso sa ilang petisyon aron makakuha og Temporary Restraining Order (TRO) sa suspension order.

Sa laing bahin, si Bokal Julian Daan kinsa mao untay molingkod sa pwesto ni Magpale giingong nagdumili sa paghural isip acting  vice  governor.   (BANAT NEWS)