CEBU, Philippines - Namatay ang usa ka 10-anyos nga bata human kini maligsi sa 10-wheeler truck didto sa sitio Lawom, barangay Carreta , dakbayan sa Sugbo sa miaging gabii.
Ang biktima nailhan sa ngalang Reyboy Pallares, 10 , molupyo sa maong lugar, samtang ang drayber sa sakyanan nga nakaligis nailhan usab nga si Jaime Lucero.
Sa imbestigasyon sa City Traffic Operations Management (CITOM) nasuta nga ang biktima kauban sa mga silingan niini nagduwa-duwa sa dapit nga nahitaboan dihang nalagpot ang iyang tsinelas sa ilawom sa 10-wheeler truck nga naghunong sa maong higayon.
Sa diha nga misuong ang biktima sa ilawom sa maong truck aron unta pagkuha sa iyang tsinelas, kalit lang usab nga milarga ang maong sakyanan hinungdan nga nalatayan ang biktima sa mga ligid niini nga maoy nakaingon sa hinanali niyang kamatayon.
Gisuwayan pa og hatud sa Emergency Rescue Unit Foundation (ERUF) ngadto sa Cebu City Medical Center ang biktima apan gideklarar kining patay na sa paghiabot didto.
Samtang ang suspetsadong drayber mitahan usab sa iyang kaugalingon ngadto sa kapolisan sa Mabolo Police Station samtang nagpaabot sa tukmang kiha nga ipasaka sa tagtungod sa biktima batok kaniya. (BANAT NEWS)