Babayeng nagsabak giluba patay sa kapuyo

CEBU, Philippines - Namatay ang  usa  ka  babayeng nagsabak  human  dunggaba sa  iyang   kapuyo didto  sa sitio Molave, barangay  Tayud, lungsod sa Liloan   sa miaging gabii.

Ang namatay mao si Leolyn Real, dalaga   samtang  ang suspetsado  mao   usab si Ronello Anoos, 46, minyo nga pulos nagpuyo sa maong dapit.

Si  SPO4 Windry  Pilapil sa kapolisan sa maong lungsod nga nahinabi sa Banat News miingon nga ang suspetsado kinsa bulag sa iyang asawa nakigpuyo sa biktima sulod   na sa pipila na ka buwan. Dugang pa niya nga sa ilang pakisusi nga gihimo ilang nasuta nga kanunay nga magkagubot  og  away  ang  duha gumikan  sa  pangabubho  sa  suspetsado ngadto sa biktima sa katahap nga nakiglambigit  kini og laing laki.

Una  mahitabo  ang  pagpanunggab,  nag-away   ang suspetsado  ug  ang  biktima  gumikan  gihapon  sa  pangabubho sa  suspetsado. Sa tanto  na  nga  sinukliay  og  init nga  mga  pulong, ang  suspetsado    mikuha  og kutsilyo  sa ilang  kusina  ug gidunggab sa makadaghang higayon ang   nagkalainlaing  bahin sa lawas  sa biktima nga maoy nakaingon sa hinanali niining kamatayon.

Ang mga barangay tanod ug pipila ka mga barangay opisyal sa maong lugar maoy unang nakatubag sa alarma   ug  dihadiha  nasikop  usab  dayon  ang suspetsado.

Matud pa ni SPO4 Pilapil nga ang  suspek kasamtangang   gibalhog sa   ilang    prisohan samtang giandam  dayon  ang double murder nga kaso batok  niini. (Romeo T.  Limpangog/WC)

Hospital andam na alang sa mga  biktima sa pabuto

Ni Chester Abadilla

Gibutyag sa  Integrated Provincial Health Office (IPHO)  nga andam na ang mga district ug mga provincial hospital  pag=atiman  sa  mga  mahimong  biktima sa pabuto atol unya sa pagsaulog sa pasko ug bag-ong tuig.

Sumala  pa ni IPHO Chief Dr. Christina Giango nga mipagawas na siya og kamanduan sa tanang mga hepe sa mga tambalanan nga gidumala sa kagamhanan sa lalawigan sa pag-andam na sa tanan nilang gikinahanglan nga  mga medical supply, mga tambal ug uban pa.

Gilantaw  na  sa  kadaghanan  nga  inig-abot  sa Disyembre 25 daghan  na  ang  pasyente  nga  ma-admit  sa mga tambalanan.

Busa  kinahanglang  maatiman  dayon  ang  mga  samaron  nga masugamak  sa mga  firecracker , kuwetes  ug  uban  pang matang  sa pabuto  sa  panahon  sa pasko  ug pagsugat  sa bag-ong  tuig. Kasagaran  sa  mga  mabiktima  sa pabuto mag-antos  sa pagkatangtang  sa  mga  tudlo, pagkapisok  sa mata  ug  uban  pang  mga samad  ug paso  sa kalawasan  bunga  sa pabuto.

Samtang gipahimangnuan usab ni  Giango ang katawhan ilabina sa mga edaran  sa pagmatngon  sa pagkaon  niining  mga panahona.

Ang  kinan-anay  og  tambok  ug mantikaon  nga sud-an  maoy  pipila sa  mga  matang  sa pagkaon  nga  mohatag  og  dakong peligro  sa  mga  masakiton  og  altapresyon, kidney, diabetes  ug  uban  pa.  Midugang  siya  nga kinahanglang  lantawon sa kanunay sa mga Sugboanon ang maayo ug himsug nga panglawas sa  pagsugat  sa bag-ong  tuig.

(BANAT NEWS)