P10,000 nga bonus aprobado na

CEBU, Philippines - Gi-aprobahan na sa Cebu City Council ang P10,000 nga Christmas bonus alang sa tanang empleyado sa Cebu City Hall atol sa Budget Hearing kagahapon sa Session Hall.

Nahilakip kini sa Supplemental Budget No. 3 nga nagkantidad og P59, 631, 148  alang sa General Fund Proper ug P14, 200, 000   sa special accounts.

Si Konsehal  Margarita Osmeña, ang chairperson sa committee on budget and finance, nagkanayon nga ila gyud nga gipaspasan ang pagpasar sa maong resolusyon  aron ikahatag na ugma ang mga bonus, atol sa ilang Christmas Party.

“We passed it today (yesterday) so that the bonuses will be given on Friday during the Christmas Party,” matud ni Osmeña.

Apan, tungod sa limitado na lang nga panahon sa Treasurer’s Office sa paghikay  sa  payroll sa tanang regular ug casual  nga mga empleyado, ang pagpanghatag niini  himoon  na  unya   sa December 26.

Ipang-apud-apod kini sa 1,151 ka mga regular   nga kawani  ug 2,115 ka mga casual   nga empleyado  sa Cebu City Hall. (BANAT NEWS)