Kaso gisang-at batok sa 5 ka mananagat

 CEBU, Philippines - Gipasakaan  dayon sa kapolisan og kaso ang lima ka mananagat nga nasikop  sa mga sakop sa Task Force Kalikasan (TFK) sa dakbayan sa Lapulapu   kinsa  naaktohan   sa illegal nila  nga  panagat   didto  sa  kadagatan sa barangay Tingo sa isla sa Olango , dakbayan sa Lapulapu   sa miaging  kaadlawon.

 Ang  mga suspetsado  mao sila si Wilfredo Leofenia Dano, 48, minyo,  Jeffrey Taneo Tagsip, 31, ulitawo, Jimon  Amit Igoy, 31, minyo, Redan Solon Sagarino, 27, minyo ug Ernesto Paquibot Ochea, 39, minyo nga pulos taga barangay Caw-oy, isla sa Olango, dakbayan sa Lapulapu.

Ang lima naaktohan sa  mga otoridad  sa TFK nga namana  ug  migamit   og  Compressor.

Sayo  niini ang TFK   nga gipangunahan  ni   Police Superintendent Virgil Ranes   nagpatrolya sa  kadagatan sa  Tingo  dihang  ilang nasigpatan  ang  sakyanan  sa  mga  suspetsado   hinungdan  nga  ila  kining  giusisa.

Dihang  nasuta  nila   nga  illegal ang  panagat  niini, ila dayong  gisakmit  ang  pumpboat, compressor,   tulo ka  pana,  ug  lima  ka kilong  isda   nga  nagkadaiya  ang  klase.

Sa pagkakaron nagpabilin  nga gitanggong  ang  maong  mga  mananagat  sa prisohan  sa kapolisan  sa Lapulapu samtang  magpaabot sa kasulbaran  sa  ilang  kaso.  (WC)(BANAT NEWS)