Gob. Garcia suspendido?

CEBU, Philippines - Sibaw kaayo ang hungihong kagahapon nga suspendido na si Gob. Gwendolyn Garcia apan walay bisan usa nga mikompirmar sa maong taho. Nakapasamot sa pagduda nga tinuod ang taho human naghigpit sa seguridad ang Kapitolyo sama sa pagsirado sa pultahan padulong sa Palace of Justice ug may giandam nga barikada nga mga puthaw duol sa buhatan sa gobernador.

Ang abogado ni Garcia nga iyang anak nga si Christina Garcia-Frasco nagkanayon nga wala sila’y nadawat nga papel bahin sa pagpasuspenso sa iyang inahan.

“Wala man gyud mi kadawat og bisan unsang notice. Whoever leaked those rumors must be very interested in seeing the Governor suspended,” matud pang Frasco.

Ang tigpamaba ni Garcia nga si Atty. Rory Jon Sepulveda mitug-an sa mga tigbalita nga kung tinuod man ang taho, kini may kalabutan sa kasong gipasaka ni anhing bise-gobernador Gregorio Sanchez Jr. ngadto sa buhatan sa Presidente ug giimbestigar sa Department of Interior and Local Government (DILG). Masaligon si Sepulveda nga ang reklamo ni Sanchez dili igo nga makasuspenso ni Garcia.

Dagkung tulda ang gipahimutang kagahapon atubangan sa Kapitolyo alang sa mga nagbilar sa pagsuporta kang Garcia.

Matud pa ni Sepulveda nga usa sa tumong nga gihugtan ang seguridad aron malinawon ang pagbilar sa mga tawo.

Sayo pa kagahapon namatikdan ang ubay-ubayng mga barangay health workers gikan sa kalungsuran ang nagtapok sa Kapitolyo hangtud nga nagbilar sila kagabii.

“My Mom will continue to serve the Cebuanos because she is their lawfully elected governor,” matud pang Frasco.

Karong adlawa, gikatakda nga ihatud ang suspension order batok kang Garcia samtang manumpa si Bise-Gob. Agnes Magpale isip gobernador.

Apan si Magpale nagdumili sa pagkompirmar sa taho sa dihang gitawagan sa Banat News kagabii samtang aduna siya’y gitambongan nga tigum. (EIM) (BANAT NEWS)