Opisyal sa Talisay may negosyo sa city hall?

CEBU, Philippines - Si kanhi Bise Mayor Aberdovey Belleza kinsa mikandidato sa pagka-bise mayor sa dakbayan sa Talisay sa sunod tuig nga eleksiyon nagkanayon nga adunay mga opisyal sa siyudad nga mahadlok mawala   sa serbisyo tungod sa ilang negosyo sa city hall.

Hinuon si Belleza kinsa usa ka independente  nga kandidato nagdumili sa pagbutyag sa mga ngalan sa maong mga opisyal     

Karong umaabot nga eleksiyon kaatbang ni Belleza sa pagdagan isip bise mayor mao sila si incumbent Vice Mayor Alan Bucao ug incumbent Councilor nga si Romeo Villarante sa oposisyon.

Apan  bisan  sa kalig-on  sa iyang  mga kontra si Belleza miingon  nga  wala  siya  mahulga ilabi  na  nga  wala siyay  negosyo  sa city hall.

Sa laing bahin,  ang Talisay Aqua City Gun Club Inc. nga  gipangunahan ni  Belleza   isip presidente niini nanghatag og mga pinaskohan  sa mga piniriso sa Talisay City Jail sa barangay Maghaway.

Sinakong bugas, kinarton nga mga noodles, sardinas, mga sanitary napkin alang sa mga babayeng piniriso  ug uban pa  maoy  gipanghatag  sa grupo.

Sa mensahe ni Belleza ngadto sa inmate mihisgot  kini sa ngalan ni Kongresista Eduardo Gullas, kinsa magpapiling mayor sa Talisay karong umaabot nga eleksiyon sa sunod tuig.

Gibutyag ni Belleza sa Banat News  nga si Gullas nakahatag og pinansiyal nga tabang sa gun club nga  mikabat og  P250,000 nga kwarta alang sa pag-ayo sa firing range.

Gawas niini matud ni Belleza nga migahin og laing pinansiyal nga hinabang nga P1 milyon ang Kongresista alang gihapon sa  pagpaanindot sa firing range.

Samtang sila si Ylanan ug Caballero nakatampo usab   sa mga gipanghatag nilang pinaskohan sa   mga  piniriso.

Matud ni Belleza nga bisan kinsa nga mga opisyal sa siyudad nga makahatag og tabang ngadto sa gun club iya gyud kining i-acknowledge. (WC) (BANAT NEWS)