Angol ug patay sa disgrasya bayran sa Insurance

CEBU, Philippines - Si Land Transportation and Franchising Regulatory Board (LTFRB)-7 Regional Director Ahmed Cuizon   mibutyag  kagahapon  nga ang mga naangol  ug mga patay sa aksidente sa Bogo makadawat og financial assistance gikan sa insurance company.

Matud    pa  ni Cuizon  nga  human  sa hitabo  kagahapon  sa buntag  mitawag  dayon  siya sa Passenger Accident Management and Insurance (PAMI) Agency, nga maoy insurance company sa Autobus  bahin  sa maong  hitabo.

Segun  kang  Cuizon  nga gipasaligan  siya  sa  PAMI  nga  mohatag  kini  sa insurance  karong adlawa  o ugma  sa matag  pamilya  sa  tulo ka  mga namatay  bali  og katunga  sa P75,000  nga pasiguro  niini,  ug katunga  usab  sa P15,000  nga insurance  sa matag  naangol. Sumala  pa  ni Cuizon  ang  laing katunga  niini  unya  na ihatag  sa PAMI  kun  madawat na  nila ang  tanang  mga papeles  nga  ilang  gipangayo gikan  sa  mga  hingtungdan. Sa bahin  sa tagdumala  sa Cebu Autobus, nagkanayon  si Cuizon  nga  nagka-estorya  usab  sila  si Alfonso Corominas III ang general  manager  sa maong  kompaniya  ug iyang  nasayran  nga  nangunay  gayud  kini  sa pag-atiman  sa mga  apektadong  pasahero. Nasayran  nga ang Autobus management miadto  dayon  sa dakbayan   sa Bogo   human  masayri  ang nahitabo  sa ilang  sakyanan  ug  didto   giatiman  dayon   ang  mga  naangol  ug  gidala  nila kini  sa   Vicente Sotto Memorial Medical Center   sa dakbayan  sa Sugbo.

Apan, matud ni Cuizon, nga iyang ipatawag karong alas 9:30 sa buntag  sa  iyang  opisina ang Autobus  management aron  mopasabot   nganong dili angay  suspensohon ang ilang bus.

Miingon  si  Cuizon nga adunay  walo ka mga bus nga  pareho og   franchise sa nabangga  nila nga   sakyanan.  (WC)(BANAT NEWS)