BFAR mohinabang sa nabiktima ni Pablo

CEBU, Philippines - Ang mga mananagat sa Central Visayas kansang pinuy-anan nagusbat tungod sa bagyong Pablo gitakdang makadawat  og  hinabang gikan sa Bureau of Fisheries and Aquatic Resources (BFAR-7).

Matud pa ni BFAR-7 Regional Director Andres Bojos nga ang ilang ahensya mohatag og mga materyales sa balay sama sa marine plywood ug  uban pa  aron  kadtong  wala  nay  balay  makapatukod  dayon  og  kapuy-an. Kahinumduman nga ang probinsya sa Bohol, Negros Oriental ug Siquijor ug usab ang habagatang bahin sa Sugbo nasabak sa  bagyong Pablo niadtong miaging Disyembre 4 ning tuiga.

Gipadayag ni Bojos nga mao na gayud kini sa pagkakaron ang direksyon sa ilang ahensya sa panahon nga adunay moabot nga katalagman ug ang  rumbo sa  ilang  tabang  mao  ang  mga  nanginabuhi  sa kadagatan..

Hinuon si Bojos miingon nga  nagpadayon pa sila karon sa pagsuta sa listahan sa mga mangingisda nga apektado  sa bagyo.

Sumala pa ni Bojos nga ila  gayud  nga tinuon  nga  ang  tanang  anaa  sa  listahan, tinuod  gayud  nga  mga  biktima  sa katalagman.

Si Bojos maoy nangulo sa year-end meeting sa Coastal Law Enforcement Alliance Region 7 (CLEAR) niadtong miaging Biyernes nga gitambungan sa kapin sa 15 ka membro gikan sa ahensya sa goberno ug usab sa non-government organizations.

Ang hepe sa BFAR-7 miingon nga ang ilang pagpakigbatok sa ilegal nga panagat nagpadayon pa gihapon ilabi  na  niadtong mga big-time nga illegal fishers  nga migamit  na  og  barko  nga  panagatan. Dugang pa ni Bojos nga adunay pundo ang BFAR nga P12 milyones alang sa pagpatukod sa 40-footer nga patrol boat nga modagan sa gikusgong  30 knots.

Gibutyag ni Bojos nga kining maong barko pagagamiton sa panahon sa emerhensya ug rescue operations sa panahon sa kalamidad. (WC)(BANAT NEWS)