Lima ka mananagat nadakpan sa Lapulapu

CEBU, Philippines - Gipasakaan sa kapolisan og kaso ang lima ka mananagat nga nasikop  sa mga sakop sa Task Force Kalikasan (TFK) sa kapolisan   didto  sa  barangay  Tingo, sa isla  sa Olango, sa dakbayan sa Lapulapu   sa miaging  kaadlawon.

Wala  makaikyas  ang  maong  mga  suspetsado nga naaktohan   nga  migamit  sa  ilang  illegal nga panagat  didto  sa maong  lugar.

Ang  mga suspetsado  mao sila si Wilfredo Leofenia Dano,  48, minyo,  Jeffrey Taneo Tagsip, 31, ulitawo, Jimon  Amit Igoy, 31, minyo, Redan Solon Sagarino, 27, minyo ug Ernesto Paquibot Ochea, 39, minyo nga pulos taga barangay Caw-oy, isla sa Olango,   sa maong dakbayan.

Ang lima naaktohan  sa mga sakop sa TFK sa maong dakbayan nga gipangulohan ni Police Superintendent Virgil Ranes busa  gisakmit  dayon  sa  mga otoridad  ang mga kahimanan nga ilang gigamit isip ebidensiya sa kaso nga ilang gipasaka.

Nasakmit sa mga sakop sa TFK ang pumpboat nga kolor   puti  uban sa makina nga Briggs and  Straton nga adunay makina nga napulo ka balyos o 10 horse power.

Dugang nasakmit nga mga ebidensiya mao ang usa ka unit nga compressor, walo  ka set nga home made fins, tulo ka pana- pana ug lima ka kilo nga lainlaing matang sa isda.

Si Superintendent Ranes  sa iyang taho ngadto kang Senior Superintendent Lawas miingon nga na-aktohan nila  ang  walo ka dinakpan atol sa ilang pagpatrolya sa kadagatan sa maong dapit. (Romeo T.  Limpangog/WC) (BANAT NEWS)