Hubog nagpataka og tabi nadakpan
CEBU, Philippines - Tungod sa kahubog ug katabian sa usa ka lalaki nahibaw-an hinuon ang krimeng dugay na niyang gitagoan hinungdan sa pagdakop kaniya sa kapolisan sa dakbayan sa Mandaue.
Nasuta nga dul-an katorse ka tuig nang dunay warrant of arrest sa kasong pagpatay sa iyang paryente si Jose Alin Pescador, 40, residente sa Purok Calipay Brgy. Opao sa maong dakbayan.
Matud ni PO1 Rolito Estrobo, desk officer sa Mandaue City Police Office (MCPO) Station 5 nga ang mga silingan mismo si Pescador ang misumbong sa kapulisan sa ilang mga nahibaw-an gikan mismo sa baba sa suspek.
Gumikan kay hubog, nagsige kini og estorya kalabot sa iyang pagtagod-tagod patay sa iyang paryente lakip na sab ang iyang kaso sa pagpatay didto sa kaulohan hinungdan nganong mibalik siya dinhi sa Sugbo human sa pila ka tuig nga pagtago-tago.
“Paryente ra man pud to niya ang iyang gipatay nya iya gyud daw ‘tong gitagodtagod tungod sa iyang kalagot kay gihiloan man iyang amahan,” butyag ni PO1 Estrobo.
Nasayran nga kaniadto pang tuig 1998 napasakaan og kaso si Pescador apan nakaikyas kini ug wa na makit-i pa sa ilang dapit human ang pagpatay.
“Pag-ikyas niya, niadto siya’g Manila unya nakapatay na pud ni siya didto (sa Manila) maong nibalik siya diri sa Cebu,” dugang ni PO1 Estrobo.
Kasamtangang gibilanggo si Pescador sa MCPO Station 5 apan gibalhin na kini kagahapon sa Cebu City Jail ug wala tugoting makapiyansa alang sa temporary niining kagawasan. (BANAT NEWS)
- Latest
