Buhatan sa GSP gilungkab

CEBU, Philippines - Kapin kon kulang 600 mil ka pesos ang nadala sa mga kawatan nga nakasulod sa directors office sa Girl Scout of the Philippines Visayas Regional Center sa barangay Capitol Site.

Ang hepe sa kapolisan sa Theft and Robbery Section (TRS) Chief Insp. Rolando Pinili mibutyag nga aduna silay unom nga gipaubos sa polygraph test o lie detector test diin naglangkob kini sa janitor, duha ka cashier, duha ka gwardiya ug ang caretaker niini. Matud pang Pinili nga base sa gibutyag sa janitor nga si Teodulo Gabonada nga nianang pagkaalas- 6 sa buntag niya nabantayan nga abli na ang vault sa buhatan sa ilang regional director. Gihulagway ni Pinili nga gilugit ang numero sa vault diin susama sa nakita ni Pinili nga adunay nahitabong inside job sa maong insidente.

Matud pang Pinili nga bugtong ang duha ka cashier lamang nga silang Marilyn Duran ug Maria Melma Cabriana ang nasayod sa number combination sa vault.

Sa  gihimong pakisusi sa mga imbestigador walay nakitang may “force entry” sa buhatan.

Ang gwardiya sa maong dapit nga naka-duty niadtong tungura nga si Glecerio Buquero miingon nga wala siyay namatikdang adunay laing tawo nga misulod sa maong buhatan gawas lang sa caretaker nga maoy katapusang misulod nianang pagkagabii.

Dako kaayo ang pagtuo ni Pinili nga inside job ang maong pagpangawat. Ang nakawat giingong kabahin sa bonus sa mga empleyado sa GSP, dunay  P20 mil usab nga narekober.  (BANAT NEWS)