CEBU, Philippines - Higpit nga ipatuman sa Commission on Elections (COMELEC) ang paglahugay sa tanang election officer sa kalungsoran ug dakbayan sa Sugbo ug sa tibuok Central Visayas sa Enero sunod tuig.
Gibutyag kini ni Asst. Regional Director Veronico Petalcorin sa Comelec 7 atol sa interview sa Bantay Radyo kinsa nagkanayon nga walay gipili ang maong re-shuffling karaan ug bag-o nga election officer.
Matud ni Petalcorin nga gimando kini ni Comelec Chairman Sixto Brillantes aron pagpapas sa mga katahap nga may paboran ang mga election officer nga mga kandidato sa adlaw sa election.
Midugang siya nga andam na sila sa pagpatuman sa maong lahugay apan iyang gipasabot nga sugod sa Enero 2013, ipatuman na ang election period ug maoy tukma nga panahon sa pagpatuman sa maong lahugay.
Sayo niini kagatosan ka mga molupyo sa lungsod sa Sta Fe nga gi-representahan ni mayoralty candidate Jose Titing Esgana ang mipirma og manifesto nga nag-awhag sa Comelec pagpabalhin og distino sa ilang election officer nga si Neriza Gigante tungod kay 15 na kini ka tuig nga nadistino sa maong lungsod. (BANAT NEWS)