Giluba sa kontra sa iyang bayaw kritikal

CEBU, Philippines - Kritikal  ang kahimtang sa usa ka construction worker human dunggaba ang buko-buko  niini  sa kontra  sa  iyang  bayaw  didto sa Sitio San  Antonio, barangay Binabag, siyudad sa Bogo niadtong Martes  sa hapon.

Ang biktima mao si Arnold Sarda Panto-an, 32, ulitawo, nga taga  Sitio Tangub,  barangay Binabag, dakbayan  sa  Bogo ug    usa ka  construction worker.

Samtang ang suspek mao si Jessie Malinao Degamo, 32, ulitawo nga silingan  ra  usab  sa biktima.

Si PO1 Leonides Pedrano sa Bogo City Police  Station  mibutyag  sa Banat News   nga didto  sa trabahoan  ang  biktima  sa maong  higayon  dihang  nakit-an  niini  ang  iyang  bayaw    nga  si Redorse Sarsalejo, hingkod,  nga  gisumbag  sa suspek.

Hinungdan  nga miduol  ang  biktima  ug  gibadlong  ang suspetsado, dayon  mitalikod  ug  mibalik  sa  iyang  trabaho.

Apan  wala  niya  dahoma  nga  nasuko  diay  ang suspek  ug gisundan  siya  niini dayon  gihansakan  sa kutsilyo  ang  iyang  buko-buko  ug  wala  pa  gayud  matagbaw  ang  suspek  mikuha pa  kini  og  botelya  dayon  gipuspos  ngadto  sa biktima. 

Maayo na lang  kay nakadagan pa  ang biktima  ug didto mosumbong  kang  barangay kapitan Aida Mangubat   sa maong  barangay.

Ang suspek nadakpan   dayon  sa kapolisan  ug  gibalhug  dayon  sa prisohan samtang  nagpaabot  sa kaso  nga  ipasaka  sa biktima  batok  kaniya. (BANAT NEWS)