Cogtas mihimakak sa pasangil

CEBU, Philippines - Gihimakak  kagahapon ni Danilo Cogtas, usa ka radio blocktimer ang pasangil nga siya maoy misabwag sa pulong tsunami nga nakapahadlok  sa kaliboan ka  mga Sugboanon  niadtong  Pebrero 6, 2012.    

Si Cogtas atol  sa imbistigasyon sa sala  ni  Judge Anatalio Necesario sa Municipal Trial Court in Cities (MTCC) Branch 2 mipamatuod  nga wala siya’y  sala.      Iyang  gitug-an  nga pulos  tumo-tumo  ang  maong pasangil  batok kaniya aron pagguba  sa iyang pagkatawo.

Midugang  siya  nga walay kamatuoran  ang pasangil  nga  migamit siya og megaphone pagsabwag sa  balita  nga ang  tsunami nagkaduol  na  sa dakbayan sa Sugbo.

Si  manlalaban Ruphil Bañoc, abogado  ni Cogtas  nagkanayon nga ilang iprisentar si Cogtas as usa ka witness sa kaso ug sa mga opisyal  sa  Philippine Institute of Volcanology and Seismology (Phivolcs), ang   ahensya  sa kagamhanan nga  maoy miluwat  og  tsunami alert No. 2 sa Cebu  ug  sa kasikbit  nga  mga  lalawigan kinsa  napakyas  usab  sa pagpasabot  sa kahulogan sa  tsunami alert No. 2 diin  inosente  kaayo  bahin  niini  ang  iyang  kliyente.

Pipila  sa  mga saksi  nga  sila  si Ryan Pedrosa ug  Roldan Espina, pulos  mga drayber  sa traysikol  nagkanayon nga alas 2:00 sa hapon niadtong  Pebrero 6, samtang naghuwat  sila og pasahero ilang nakita ang mga tawo nga naglumba og dagan padung  sa Barangay Busay nga nagkanayon  nga  mitubo na ang  dagat  sa Pasil  ug  nagpadong  na  ang  tsunami sa maong  lugar.

Busa  misuway  sila   pag-adto  sa Pasil fish port ug sa wala  pa sila makaabot  didto  nasugatan  nila si Cogtas  nga nangugat  pagsinggit  nga  “anaay tsunami”.

Gitakda  na  usab  ang  laing imbistigasyon  niining maong kaso  unya sa Pebrero 6, 2013. (BANAT NEWS)