Simple nga Christmas party ra

CEBU, Philippines - Gipahimangnoan sa Department of Education (DepEd) ang mga prinsipal ug magtutudlo sa pampublikong tunghaan nga himuong yano og simple ang pagpahigayon og Christmas Party sa mga tunghaan.

Si DepEd regional director Carmelita Dulangon subling mipahimangno sa “no collection policy” gikan sa mga tinun-an. Matud pa niya bisan sa yanong paagi basta masaulog lang ang kapaskuhan sa mga tinun-an sa ilang mga tunghaan paigo na. Si Dulangon mibutyag sa Banat News nga sa miaging tuig dunay mga ginikanang nangreklamo tungod kay gi-obligar ang mga ginikanan sa pag-amot.

Nasuta sa Banat News nga dunay mga magtutudlong maoy mosugyot kung unsay buot niyang kombira o gastuhon panahon sa Christmas Party.

Samtang duna say  mga ginikanan nga magpasikat ngadto sa mga magtutudlo ug maoy mamugos kabahin sa amotanan ug wala na maghunahuna pa sa ubang mga kabus nga ginikanan.

Si Dulangon mipasidaan nga ang mga magtutudlo nga mareklamo diha sa iyang buhatan mag-atubang gyud og imbestigasyon ug kung mapamatud-an silotan kini.

(BANAT NEWS)