Polis naunay

CEBU, Philippines - Nalandig sa tambalanan ang usa ka police nga sakop sa City Intelligence Branch human aksidenteng naunay sa giluklok niyang armas atol sa ilang gihimong saturation drive sa miaging gabii diha sa barangay Mambaling ning dakbayan.

Ang naunay sa iyang pusil nga kalibre .45 mao si PO2 Dennis Mosqueda diin maayong pagkaigo niini ang iyang walang bahin sa paa. Ang hepe sa kapolisan sa syudad sa Sugbo, Sr. Supt Melvin Ramon Buenafe mibutyag sa diha nga nahinabi sa Banat News nga sa ilang inisyal nga imbestigasyon nasayran nga human sa gihimong saturation drive giingong nasangit ang armas ni Mosqueda ngadto sa usa ka motor nga maoy hinungdan sa pagbuto niini.

Si Mosqueda dali usab nga gidala sa Chong Hua Hospital.

“You should always be alert to all those kind of situation, dapat handa ka talaga, pero sa nangyari accidental yun eh,” butyag pa ni Buenafe. “We will also investigate on the probable liability, to learn lessons from the incident because it might be the firearm is defective, we will do this to inquire what really happen,” pasabot pa ni Buenafe.

Sa nasayran, nga ang grupo sa CIB nga gipanguluhan ni Chief Insp. Romeo Santander mipahigayon og saturation drive batok sa illegal gambling  diha sa maong dapit dihang nahitabo ang aksidente.

Gani, nakakuha ang kapolisan og 16 ka mga video karera machines apan napakyas sila sa pagsikop sa mga tag-iya niini human walay bisan usa ang miangkon niini. (BANAT NEWS)