Suspek sa scam mitahan

CEBU, Philippines - Magtiayong nalambigit sa laing matang sa pyramiding scam mitahan sa kapolisan niadtong Disyembre 6 human makadawat og death threats gikan sa mga nabiktima.

Ang magtiayong mitahan mao silang Danilo ug Janet Gujilde, kinsa miduol sa buhatan ni Chief Insp. George Ylanan, head of the Regional Special Operations Group of the Police Regional Office 7.

Si Ylanan mibutyag nga ang magtiayon nag-atubang og kasong estafa sa Quezon City ug lain usab nga susamang kaso sa Maasin City sa Southern Leyte.

Dugang pa ni Ylanan nga ang duruha adunay warrant of arrest tungod sa nahisgutang kaso. “Daghan na kaayo hulga sa among kinabuhi, mao nga ni-surrender mi,” butyag pa ni Janet. Gihulagway usab niini nga ang iyang estafa nga kaso sa Maasin City walay kalabotan sa multi-million scam sa Quezon City.

Gipasabot usab ni Ylanan nga karun lang nila gipahibalo sa media ang kabahin sa duha tungod sa ilang follow up operation kalabot sa maong kaso.

Matud pa ni Ylanan nga base sa kasong gisang-at batok sa duruha diha sa Quezon City ang magtiayon gipasanginlang nakadala sa P400 milyones gikan sa mga magtutudlo nga ilang gi-recruit aron mo-invest sa school supply business inubanan sa pasalig nga motubo kini  og dos porsiyento kada semana.

Apan ang magtiayon miklarong wala kaabot og P400 milyones ang gipasangil nga ilang nabulsa tungod kay P13 milyones ra ang ilang nadawat gikan sa mga biktima.Usa ka ginganlan og Thelma Santos nga taga Quezon City maoy ilang gitumbok nga mastermind sa maong scam. Matud pa nila bisan sila gipasaligan ra usab ni Santos nga makadawat og 20 porsiyentong tubo kada bulan.

Matud pa ni Janet nga didto sila nagkaila ni Santos sa Quezon City ug diin usab giagni siya niini nga mag-invest sa maong matang sa negosyo ug nagsugod usab sila sa pagpang-recruit. Apan gumikan sa pagkayabo sa maong negosyo nakadawat na sila og mga death threats maong mipuyo sila sa barangay Lahug ning dakbayan sa Sugbo.

Matud pa ni Ylanan nga usa sa mga nabiktima mao si Hayde Estoque, nga usa ka direct seller kinsa mi-invest og P3.6 milyones gikan sa pagsugod niini og P20 mil. Matud pa ang P20mil ni Estoque mitubo og 10 porsiyento maong gidugangan niini ang iyang gi-invest hangtud nga naabot sa P3 milyones apan wala na mopakita ang magtiayon. (/EIM)(BANAT NEWS)