Modernong Rice mill sa Bohol gisubhan

CEBU, Philippines - Gitambongan  sa 1,000  ka  mag-uuma  ang pormal nga  Inauguration ug Turn Over Ceremony sa Rice Processing Complex (RPC) didto sa Poblacion, Pilar, Bohol sa miaging Lunes nga gitukod aron  modako ang  kita  sa  mga mag-uuma  og  humay ug makab-ot ang  programa  nga rice self-sufficiency sa tuig 2013 sa kagamhanan.

Kining maong proyekto malampusong naimplementar pinaagi sa panag-alayon sa Korean International Cooperation Agency (KOICA), ug usab sa Department of Agriculture (DA), inubanan usab sa Local Government Units (LGU's) sa probinsya sa Bohol ug sa lungsod sa  Pilar.

Matud pa ni Lee Hyuk, Ambassador Extraordinary and Plenipotentiary Republic of Korea to the Republic of the Philippines nga tungod kay naggikan  siya sa usa ka mag-uumang pamilya, wala gayud siya magduha-duha sa paghatag og tabang sa mga mag-uuma sa probinsya sa Bohol tungod sa kamahinungdanon  niini.

Alang kaniya lisud gayud molambo  ang  kahumayan kun walay tukmang pasilidad nga magamit.

Dugang pa niya nga pinaagi sa RPC nga puno sa modernong pasilidad nga magamit alang sa paghikay sa humay, piho nga molambo ang panginabuhian sa mga mag-uuma tungod kay dili naman kaayo sila dako og kahago sa pag-atiman  niini gikan  sa pagtanom hangtud  sa pagbugas  niini.

Matud pa usab ni DA Undersecretary for Special Concerns Bernadette Romulo Puyat nga nalipay siya nga milampos  ang ilang paghago    og  pagpangayo og tabang sa kagamhanan sa Korea alang  sa gikinahanglang  kahimanan  sa panguma. Dugang pa ni Puyat nga ang pagkatukod sa RPC maoy katumanan  sa  mga pangandoy  sa DA aron hingpit nga molampos  ang  rice self sufficiency program niini  sa sunod tuig.

Ang RPC adunay drying capacity nga 40 ka tonil, matag walo  ka oras nga pagpauga, mogaling og tulo ka tonil o 22 ka sako nga tipasi sa usa  ka arangkada  sa maong galingan.   Dul-an sa usa ka libo ka mga mag-uuma ang misaksi sa pagsubo  sa maong kahimanan diin  sa samang  higayon  gipirmahan  sa  tulo  ka partido ang Memorandum of Agreement (MOA) tali sa opisyal sa Korea, sa DA ug usab sa lokal nga mga opisyales sa kagamhanan sa probinsya sa Bohol. (BANAT NEWS)