Dalaga gitigbas sa kapuyo nawong natabas

CEBU, Philippines -  Natabas ang nawong ug baba sa 20 anyos nga dalaga human kini tigbasa sa iyang hubog nga kapuyo atol  sa ilang panaglalis  sulod  sa ilang pinuy-anan  sa Sityo San Roque ,barangay Kawit, sa lungsod sa Medillen niadtong Domingo sa  gabii.

Ang biktima mao si Maryjane Francisco, 20, dalaga, samtang  ang  suspetsado  mao  ra usab  ang iyang kapuyo  nga si Joel Ababa, 28, usa ka mananagat.

Si PO2 Roselito Ortega sa Medillen Police Station mibutyag  sa Banat News nga sa  wala  pa  ang  pagpanigbas giyawyawan  sa biktima  ang  suspetsado  gumikan  sa kahubog  niining  miuli  sa ilang  balay  nga maoy sinugdanan  sa ilang  lalis.

Dihang  wala  na  makapugong  ang suspek mikuha  sa iyang  sundang  ug  gitigbas sa nawong ang  biktima, ug natabas  usab ang  baba niini  ug hapit  usab  maigo  ang  mata.

Ang  mga  silingan  nga  gibati  og  kabalaka  maoy  mitawag  sa  kapolisan  ug   busa  naabtan  sa akto  sa  miresponding  mga  polis   ang  suspetsado  hinungdan  nga  nasikop  dayon  nila  kini  ug  gihatud  usab  nila  ngadto   sa Verallo District Hospital sa siyudad sa Bogo   ang             biktima.

Tungod  kay di  interesado  ang  biktima  nga  mokiha  sa suspek gibuhian  lang  usab  dayon  kini  sa kapolisan  gikan  sa prisohan. (BANAT NEWS)