Binghay: Di relihiyon ang rason sa pagkapilde ni Pacman

CEBU, Philippines - Dili ang pagbalhin og relihiyon ang nag-unang hinungdan sa pagkapildi ni Pambansang Kamao Manny Pacquiao batok sa Mehikanong si Juan Manuel Marquez atol sa ilang away niadtong Domingo didto sa MGM Grand Center sa Las Vegas, Nevada.

Mao kini ang panahom ni Monsenyor Esteban Binghay Episcopal vicar sa Archdiocese sa Sugbo human sa mga bagulbol sa mga tawo nga ‘gigabaan’ si Pacquiao sa pagtalikod niini sa Romano Katoliko bugti sa iyang pagsulod og laing relihiyon.

Alang kang Binghay ang kapildihan ni Pacquiao usa ka lig-ong mensahe gikan sa Kahitas-an aron kini makahunahuna kun pagka-boksidor, pagka- politiko o artista ang iyang pilion.

Alang kang Binghay gikinahanglan ang pagtutok sa usa lang ka butang tungod kay dili mahimo nga hakpon ang tanang butang dinhi sa kalibutan.

Gipasabot ni Binghay nga dili isyu para niya ang pagbalhin og relihiyon ni Pacquiao nga maoy gibasol og maayo sa iyang inahan nga si Mommy Dionisia nga nakaingon sa kapildihan tungod kay gawas nga wala na kini magsul-ob sa rosaryohan atol sa away,  wala na usab kini manguros.

Apan alang ni Binghay parehas ra sila si Pacquiao ug Marquez nga hugot nga nag-ampo sa Kahitas-an nga modaug sa away bisan unsa pay ilang tinuohan.

Susama sa ubang mga Filipino, alang kang Binghay bayani gihapon si Pacquiao sa nasud  tungod sa gipakita niining kaisog ibabaw sa ring nga maoy naghatag og dakong garbo sa Pilipinas.

Si Pacquiao sa kasaysayan sa boksing ang nakahupot og walo ka dibisyon ug wala pay boksidor nga nakit-ang makaabot sa naabot niini karon nga henerasyon. (BANAT NEWS)