Cong. PJ nagduda sa pagka-abogado ni Davide

CEBU, Philippines - Si  Cong. Pablo John PJ Garcia sa  ikatulong distrito  sa lalawigan  sa Sugbo gibati  og katahap  bahin  sa  kahanas  ug  kabatid  bahin   sa balaod  ang  iyang  kaatbang  sa   politika  nga  si  manlalaban Hilario Davide III  , ang kandidato sa pagka-gobernador    sa lalawigan sa Sugbo ubos  sa  Liberal Party.

Kini  human  siya  hagita  ni Davide  nga  kinahanglang  iyang  ibutyag sa publiko ang iya  ug  kang  Gobernador  Gwendolyn  Garcia  nga  mga  bank deposit.

Apan  matud  pa  ni   PJ nga   bisan  gamay  wala  sila mahadlok  niining maong hagit ni Davide   apan  iya  lang  gisumbalik  ang maong  hagit  ngadto  sa iyang  kaatbang sa pagkagobernador  nga kinahanglang  ibutyag  usab  niini  ngadto  sa publiko  ang  iyang  bank  deposit.

Hinuon  tungod kay giisip  niya  kining  maong hagit  nga walay kapuslanan,  gibaliwa niya  kini  tungod  kay  wala  mangita  niini  ang            katawhan.

Labaw  sa tanan wala hatagi  og  bili  ni  PJ  ang  hagit  ni Davide   nga  matud  pa  personal  niini  nga  itunol  ngadto  kang Ombudsman Conchita Carpio  Morales   ang iyang  kiha  batok  sa gobernador.

Bahin  sa  gipangayo  ni  Davide  nga  ipahibawo  sa  mga  Garcia  ang  ilang  bank deposit  ngadto  sa katawhan, si Garcia  kinsa  kandidato  sa pagka-gobernador  sa lalawigan ubos  sa One Cebu Party  nagkanayon  nga  kadto lang  inosente  maoy  mobuhat  niini.

Matud  pa  ni  PJ  nga  dili  ug  dili  nila  kini  ibutyag  sa katawhan  kay  ang  nagsugyot  niini  nagpasabot  nga  ignorante  pa sa balaod  ug  gani  nagduda  na  siya sa matang  nga pagka-abogado  ni  Davide. 

Apan gihagit  ni PJ  si Davide  nga  ipabutyag  niini  og  una  ang  iyang bank  deposit  ngadto  sa publiko ug  human  niini  siya  ug  si Gobernador Garcia  motug-an  usab  sa ilaha.

Matud  pa  sa kongresista  sa   ikatulong  distrito  sa lalawigan  nga  wala  silay  gikahadlokan  kay  wala  silay  gitago  nga sekreto

Unya  iyang  gihagit  si Davide  nga human  niini masil-ing  ang  iya  ug  kang  Gobernador Garcia  nga  bank deposit  kinahanglang  mangayo  si Davide  og  pasaylo  ngadto kanila  gumikan   niining  iyang  pagpangintriga   ug  pagbutang-butang, aron  sa pagpaila  nga  usa siya  ka  tawo  nga dungganon.

Midugang  si  PJ  nga  kining  bahad  ni  Davide  nga itunol  niya  personal  kang Morales  ang  iyang kiha dinhi  makita  ang  kahait   sa iyang  mga  rason  nga legal  ug  dili  kay  ang  abilidad  niya  sa pagkamensahero.

Hinuon  sa bahin  ni  Davide, kini nagkanayon  nga  wala  siya  magtiaw  sa publiko  kay  kun  gipamulong  niya  ang  hagit  ngadto  sa mga  Garcia  nagpasabot  kini  nga  iya  kining tinud-on  aron  masuta  ang  kamatuoran.  (BANAT NEWS)