Malinawong pamilya gitudlo sa DSWD

CEBU, Philippines - Gitudloan  sa  kagamhanan  ang  matag  pamilya  bahin  sa balanse  nga pagpuyo nga naglangkob  sa pag-atiman sa ekonomikanhong  panginahanglan  sa  mga membro  niini  ug  sa emosyonal  nga  aspeto.

Kini  pinaagi  sa pagpanguna  sa  Department of Social Welfare and Development  (DSWD) sa Central Visayas kinsa maoy mitigom  sa 46  ka  mga magtiayon  sa  usa ka seminar  nga giulohan  og   Strengthening Family Relationship. Sumala pa ni Social Worker Rosemarie Salazar, Focal Person sa  Women's Welfare Program sa DSWD nga ang goberno naningkamot  gayud alang sa  pagpalig-on  sa matag  pamilya pinaagi  sa paggiya  kanila bahin   sa panginahanglang  pinansyal  niini  ug  sa aspeto nga may labot   sa pagbati nga emosyonal.

Dugang pa ni Salazar nga pinaagi  sa malinawong  panarbaho  sa pangulo  sa panimalay  uban  sa malinawong  relasyon  sa  mga  sakop  sa pamilya, hapsay  ang  dagan  sa panginabuhi  nga  maoy  gikinahanglan  sa goberno  alang  sa malinawong  kahimtang  sa matag  pamilya.

Matud  pa  niya  nga alang  sa gobiyerno,  kun  malinawon  ang  matag  panimalay, malinawon  usab  ang  matag  barangay  nga  mosangpot  sa malinawong  lungsod  ug  syudad  ug  malinawong  lalawigan ngadto  na  sa malinawong katibuk-an  sa nasud.

Si Pastor Joel Polotan kinsa usa  sa namulong  atol  sa seminar mipasabot  nga ang ligdong ug responsabli  nga  bana ug asawa kinsa  nagmahal  sa ilang  mga anak  dako kaayo  og papel  alang  sa malinawon ug  malampuson  nga  henerasyon sa umaabot  nga  panahon. (Liezl Mabini Frasno /WC) (BANAT BALITA)