Ulitawong guwang nga drug pusher tiklo

CEBU, Philippines -   Usa ka  notadong drug pusher nga dugay nang gipanid-an   kay  nahilakip  sa drug watchlist  sa  kapolisan, nadakpan atol sa buy bust operation nga gilusad  sa mga otoridad   sa barangay Pitalo, lungsod sa San Fernando niadtong Biyernes sa alas 9:50 sa gabii. Ang nadakpan  mao si Macario Dedicatoria, 66 , ulitawo ug molupyo sa nahisgutang lugar nga walay klarong trabaho.

Si PO3 Marjurkin Misuari sa San Fernando Police Station mibutyag  sa Banat News   nga  ang suspek dugay na  nilang   gipanid-an  human kini  gidungog sa lugar nga mamaligyaay og gidiling drugas. Human  madawat  sa kapolisan  ang  impormasyon bahin   sa transaksiyon sa suspek   mihimo  dayon  sila  og  team  nga  milusad  og  buy-bust  operation   nga  gipangulohan  nila ni PO1 Lauro Laurel og PO1 Jannel Figura.

Pag-abot  nila  sa balay  sa suspek  wala kini makabantay,  busa  mitagad  kini  pag-ayo  sa usa ka polis  nga  nagpaka-aron  ingnong  pumapalit  og shabu kinsa  mitunol  kaniya  og  P200 alang  sa usa ka pakete  nga shabu. Apan  dihang  gidawat  niya  ang  maong  salapi human  ikatunol  ang  shabu  ngadto sa poseur buyer  gipabalikan  dayon  sa kapolisan  og  posas  ang  ang  pulso niini  ug  gisikop.

Wala na makaugpo ang suspek   kinsa nasakmitan  pa  og  laing tulo ka pekete  sa sulod  sa iyang  bulsa dihang  gikapkapan  siya  sa  mga  kapolisan. 

Gidala  dayon  kini  ngadto   sa  buhatan sa kapolisan ug  gibalhug sa karsel samtang gihikay  dayon  ang tukmang sumbong nga may labot  sa paglapas  sa Sec. 5 Art. 2 sa R.A. 9165 kon pagpayuhot  og gidiling drugas. Gihulagway sa kapulisan  ang suspek nga bisan  senior citizen na  apan nakahimo  pa sa pagsalmot  sa negosyo   nga makapayabag  sa ulo  sa tawo  aron mahimong  mangtas  nga  kriminal. (WC).    (BANAT NEWS)